Sarawak, Fujian mujur nyain sempekat kemari
KUCHING: Perintah Nengeri udah mujur nyain Deklarasyen Sempekat Pemanah Kaul enggau Perintah Sitak Fujian, Republik Rayat China, kemari.
Pengawa nyain sempekat nya dikemataka Sapit Kepala Menteri Datuk Amar Douglas Uggah Embas ngarika Kepala Menteri Datuk Patinggi Tan Sri Adenan Satem.
Dalam teks jaku Adenan ke dibacha Uggah madah, deklarasyen nya dikena nandu ‘Surat Niat’ pasal penumbuh ‘ Friendship- Province Relationship’ entara Perintah Sarawak enggau Sitak Fujian, Republik Rayat China ke disain kena 13 September 2015.
“Deklarasyen tu deka meri penguntung ngagai rayat enggau orang dagang kitai iya nya ngangkatka kerejasama dalam ekonomi enggau pengawa dagang, sains enggau teknologi, jalai pengidup, lumba enggau main, pengerai, pelajar enggau kebukai.
“Aku ngarapka deklarasyen tu deka mai kerejasama ti lebih besai sereta mayuh agi betukar pekara ke lebih manah entara Sarawak enggau Fujian,” ku iya.
Pengawa nyain sempekat nya ke diatur ba sebuah hotel ditu kemari, Perintah Sarawak diarika Menteri Pemansang Industri enggau Orang Dagang, Pengawa Dagang enggau Pemeranak Puku Datuk Amar Awang Tengah Ali Hasan enggau Sapit Sekretari Perintah Nengeri ( Transformasyen Sosio- Ekonomi) Datu Ismawi Ismuni lalu Fujian diarika Mandal Gabenor Sitak Fujian, Hong Jiexu enggau Ye Min.
Nambahka nya iya madahka China iya nya bakih dagang ti pemadu beguna ngagai Malaysia sereta China mega bakih dagang besai Sarawak.
Ekonomi China kedua pemadu besai di dunya, lalu ke diatu China bejalaika inisiatif strategik ‘One Belt, One Road (OBOR)’ ti mekuh ngagai penyambung enggau kerejasama entara menua besai entara China enggau Eurasia.
“Berebak enggau nya mega China benung chakah matau peluang endur beranakka puku di menua luar.
“Nya alai, bisi potensial besai ba pengawa dagang enggau pemeranak puku entara Sarawak enggau China ke bedau diteresa,” ku iya.
Kelimpah ari China, Perintah Nengeri mega ngelaluka pemeranak puku ari menua luar enggau dalam beranakka puku di nengeri tu dalam beberapa bidang.
Entara multinational corporations ke udah sereta benung meranakka puku di nengeri tu baka Taiyo Yuden ari Jepun; X-Fab ari Jerman; HGST (Western Digital company) ari Amerika; LONGi and Comtec Solar ari China enggau mayuh ke bukai.
Dulu ari nya dalam jaku pengelalu Awang Tengah madahka, lebuh ke betemu sereta enggau Vice Gabenor Liang Jianyong, mayuh pekara ke ulih dipejalaika entara Sarawak enggau Fu- jian baka ngangkatka kaul entara kededua menua sereta ngangkatka pengawa dagang enggau pemeranak puku kededua menua.
“Maya ke betemu sereta berandau nya, kami ngasaika Sarawak enggau Fujian ulih bekerejasaama dalam mayuh pekara, baka merambuka penyambung penerebai entara Sitak Fujian enggau Sarawak.
“Kitai mega setuju bekerejsama sereta beranakka puku dalam industri ke dipilih di Sarawak baka industri elektronik teknologi tinggi, Energi industri intensif ; industri betanam betupi, berikan enggau biomass; industri pemakai halal, ngaga kapal kelipah ari kaul bilat- eral ‘Government to Government’ (G-to-G),” ku Awang tengah.
Nambahka nya Perintah Nengeri mega ngelaluka pemeranak puku ti bisi teknologi tinggi dalam industri hiliran bekaul enggau minyak enggau gis; ngemansutka kimia dalam industri sawit, industri bukai nangkanka nya baka industri bepelasarka plywood, kereban dalam rumah enggau ke bukai.
Sama bisi datai ngemataka pengawa nyain sempekat nya kemari Menteri Muda Pemansang Industri enggau Orang Dagang, Pengawa Dagang enggau Pemeranak Puku Datuk Mohd Naroden Majais enggau Datuk Julaihi Narawi esereta bala bukai.