Pemansang pengawa betanam betupi bepanggai ba teknologi moden
KUCHING: Pengawa betanam betupi enda ulih maju enti enda dikemansangka ngena teknologi baru.
Sapit Kepala Menteri Datuk Amar Douglas Uggah Embas madah, dikena ngangkatka teknologi betanam betupi baru kitai deka ngerembaika pengawa betanam betupi nengah program ti dikumbai ‘program mindahka teknologi’.
“Ba menua ke mansang, ngangkatka teknologi baru mayuh agi dikuasa pampang peribit sereta pengawa dagang. Taja pia, tebal agi ba menua ke mansang ti ngembuan mayuh orang ti ngemeratka pekara nya nyadi sebengkah tanggungpengawa ke berat.
“Kitai dalam kategori nya laban kitai ngembuan mayuh ruang bilik di menua pesisir ti bepanggai ba pengawa betanam betupi ke nyadi batang pemakai sereta pemisi sida.
“Nya alai, tanggungpengawa Opis Betanam Betupi ( JPS) ngemeratka sistem pengerembai ungkup pekebun mit ngambika ulih ngena teknologinya,” ku Uggah.
Iya madah munyi nya lebuh bejaku bejadi Konferens Pemesai Kanan Opis Betanam Betupi di sebuah hotel ditu, kemari.
“Aku nemu suba, JPS bisi program pengerembai tang enda nemu nama kebuah udah nya, enda dikena agi. Aku suah pulai ke rumah panjai kami, lalu aku suah endar mendingka sebana ari mensia mayuh lebuh JPS ngelawa rumah panjai lalu madah ngagai sida iya pasal pengawa betanam betupi di rumah panjai nya.
“Aku nerima pemadah ari pemesai JPS ti madahka program penyambung penger- embai nya disengkaum dalam sistem projek ti dipejalaika. Enti nya amat, aku berundingka nama utai diberi JPS ngagai orang bumai tauka bekebun ke nadai nasit nerima projek Perintah.
“Enggau subsidi pan nyau majak kurang, orang ke bekebun tauka bumai pan majak mayuh ke nadai jalai ngelala teknologi baru,” ku iya.
Uggah ti mega nyadi Menteri Pengawa Betanam Betupi Moden enggau Ekonomi Menua Pesisir, madahka iya mega nemu pasal penanggul nya bisi dibantaika enti Opis Kandang Pelilih Menua udah dibuka.
Taja pia ku Uggah, taja pan iya ukai orang ke pakar dalam pengerembai pengawa betanam betupi, lalu madahka penyambung pengawa nya enda relevan agi, tang ku iya, Opis Menteri nya betatika pemutus.
“Lalu pemutus kedeka aku, iya nya orang bumai, bekebun, berikan bisi chara ke muntang ngena teknolgi pengawa betanam betupi ulih pengeluar, baik sida nya orang bekebun ke mit, orang dagang ke mit, tauka kompeni mit.
Sebedau nya, ba jaku Direktor Opis Betanam Betupi Sarawak Lai Kui Fong, iya madah ba pekara bekait enggau Hak Reta Intelektual (IPR) diatu majak berat ba pengawa betanam betupi kelebih agi lebuh produk udah masuk ngagai pengawa dagang.
“Reta Intelektual ( IP) nyengkaum ( paten, hak ngaga barang, dagang enggau Pengelala Geographical tauka GIs). GI tu kelai dikena ba produk ke ditemu asal iya lalu ngembuan kualiti tauka nama ke tebilang ketegal ari penatai produk nya,” ku Lai.
Baruh GIs ku iya, Sarawak udah bisi produk direjista nengah JPS baka Beras Bario, Beras Biris Sarawak, Beras Bajong Sarawak, Terung Asam Sarawak, Dabai Sarawak, Isau Sarawak, Buah Rian Nyekak Sarawak sereta Ikan Terubuk Mulut Besai Sarawak.
“Aku berasai temegah ati kenyau ari taun 2015 kami udah nerima empat setipikit GIs ke Ubi Kayu Sarawak, Sarawak Midin, Ikan Empurau Sarawak, enggau Ikan Puput Sarawak,” ku iya.
Setipikit GI diberi ngagai Sarawak Information Technology and Resources Council ( SITRC) ari Malaysian Intellectual Proprty Organisation (MyIPO).
“Naka ke diatu, kami agi nganti pemendar ari MyIPO ngerijista empat iti produk, Beras Wai, Ikan Buntal, Ikan Bulu enggau Ikan Tapah,” ku iya.
Sama bisi ngulu atur pengawa nya kemari, Menteri Muda Ekonomi Menua Pesisir sereta Idustri Kebun Datuk Francis Harden anak Hollis Tini, Menteri Muda ke Ekonomi Menua Pesisir (Pesisir Pantai) enggau Pengawa Berikan Datuk Julaihi Nahrawai, Menteri MUda Pengawa Betanam Betupi (Gerempung Orang Bumai) Mussen Lamoh, Sekretari Mendam Opis Menteri Pengawa Betanam Betupi enggau Ekonomi Menua Pesisir Datu Dr Ngenang Jangu.