‘Drone’ deka dikena ngaga kar tanah, ku Uggah

Belabuh dipejalai ba bulan Disember dikena ngelala pemesai bungkur tanah deka endur nanam komoditi

KUCHING: Teknologi moden baka ngena ‘Drone’ disadang deka dikena ngaga kar tanah di menua tu endur betanam komoditi baka sawit, getah, nyiur, sagu enggau komoditi bukai berengkah ari bulan Disember tu ila.

Sapit Kepala Menteri ti mega Menteri Pengawa Betanam Betupi Moden enggau Ekonomi Menua Pesisir madah, pemisi teknologi baru nya, perintah menua nemu naka pemesai bungkur tanah deka alai nanam komoditi tu.

“Ambika chunto, enti pemesai tanah alai bekebun getah di Sarawak bisi 170,000 hektar, ni gaya bungkur pemesai tanah nya, nya alai ngena sistem ‘remote sens- ing’ tauka ngena ‘Drone’, baru kitai ulih meda gambar ke tampak agi,” ku Uggah.

Iya madah munyi nya lebuh dikerandau pengudah bejadika Konferen Pemesai Opis Perintah Kanan dalam Opis Menteri nya ari serata Nengeri Sarawak ke benung baum pengelama tiga hari di sebuah hotel ditu, kemari.

Nengah teknologi baka drone ku iya, opis menteri iya ulih ngaga pelin ke pemadu manah dikena ngemansangka komoditi ke deka ditanam jemah ila.

“Enggau chara tu, kami ulih merambu pelin ke strategik ke semua bungkur sitak dalam kandang Nengeri Sarawak.

“Ngena teknologi moden baka ‘ Drone’, kitai ulih ngambar sereta ngaga pelin ke pemadu manah dikena ngemansangka komoditi ke patut di menua tu, jemah ila. Enti diperatika, kompeni ke besai-besai sigi ngena teknologi moden, semina Opis Betanam Betupi Sarawak (JPS) ke bedau bisi teknologi nya.

“Nya alai, ngarapka pengabis laun bulan Disember tu ila baru ulih berengkah ngena teknologi moden ‘Drone’,” ku iya.

Douglas Uggah Embas Sapit Kepala Menteri Sarawak