Mayuh bengkah projek pemansang udah diperambu ungkup DUN Semop
BINTANGOR: Tikas pengidup rayat ba Kunsil Nengeri ( DUN) Semop semampai deka diangkat ngambika seraka pemansang menua pesisir enggau kandang mengeri ulih dirapitka agi.
Kaban Kunsil Nengeri (ADUN) Semop Abdullah Saidol madah, juluk ati nya nyengkaum ngungkupka agih sepenyampau nyauka RM1.27 juta dikena ngaga beberapa bengkah projek ari Program Transformasyen Menua Pesisir (RTP).
“Ke diatu kitai udah nentuka empat bengkah projek RTP ti bela beungkus RM94,000 seiti deka digaga baka projek ngaga baru padang semin Muara Bunut, ngaga langkau alai ngetu ( RNR) sereta agu mensia mayuh ba Penyangkai Feri Bintangor, ngemanahka Balai Mensia Mayuh Kampung Tanjung Bundong enggau ngaga baru pagar Balai Mensia Mayuh Kampung Melayu Bintangor.
“Nambahka nya, sepenyampau RM141,000 deka diungkupka ngagai tiap bengkah projek ngemanahka jalai Rumah Slyvester enggau ngaga baru jalai semin Rumah Lawai di Sungai Sian.
“Projek RTP ke beungkus RM376,000 bela diungkupka dikena ngaga projek ngema- nah sistem parit Kampung Melayu Bintangor enggau RM235,000 agi dikena ngaga projek ngemanah jalai ari jalai besai ngelawa Balai Mensia Mayuh Kampung Melayu Bintangor,” pia ku iya ngerintai.
Ku iya, genturung menua di DUN Semop ke bukai endang bela deka diungkupka projek RTP nya nangkan ke tu ila.
Iya mantaika jaku tu maya Pesta Limau 2016 di Bintangor, lemai kilah ensana.
Abdullah ti mega Ketuai Sekretari Kepala Menteri maya tu bela nerangka reti RTP ba mua mensia mayuh ke bisi datai.
Iya madah, RTP seiti ari inisiatif Kepala Menteri Datuk Patinggi Tan Sri Adenan Satem ti ngembuan tuju deka nempa pengidup ti lantang ba menua pesisir.
“Nya alai, aku deka chakah agi bepintaka ungkup baik nya ari perintah nengeri tauka perintah besai dikena bejadika macham bengkah projek rayat ba serata genturung menua di N.42 Semop,” ku iya besemaya.
Berebak enggau tu mega, Chairman Kelab Penyukung Barisan Nasional (BN) nya bela madah, semua pengari rayat Barisan Nasional diatu dipinta Kepala Menteri napatka Indeks Pemanah Gawa (KPI) dikena bejalaika tanggungpengawa ngagai rayat.
Ku iya, pengari rayat mega dipinta nganjung ripot sida ngagai Kepala Menteri tetiap enam bulan sekali.
“Kebuah perintah nengeri ngaga semua tu ngambika semua agih geran projek mit menua pesisir (MRP) ulih pulaika penguntung ngagai rayat sereta enda bechiping.
“Tu mega dikena nentuka bala pengari rayat semampai datai betemu enggau rayat di menua.
“Sida mega meseti bekerejasama begulai enggau ejensi perintah ti bekaul ngambika ulih matau semua projek rayat digaga enggau nitihka pematut sereta mujur,” pia ku iya nambah.