Kes makai suap ba nembiak IPT nyeremin pekara ti nyadi ba perintah menua: Baru
KUCHING: Kaban Kunsil Nengeri (ADUN) Ba Kelalan, Baru Bian tekenyit macha pasal kes makai suap ke ngaul bala nembiak ba institut pelajar tinggi di nengeri tu.
Taja pia ku Baru, pekara tu enda patut nyadi berita ti ngasuh tekenyit, laban tu nyeremin pekara ke nyadi ba semua renggat perintah di menua tu.
“Bala nembiak nya semina nitihka pengawa ti digaga orang ti bekuasa,” ku iya ba sebengkah penerang berita kemari.
Baru nimbal penerang ti dipansutka Sapit Ketuai Komisioner Nagang Pengawa Makai Suap Malaysia (SPRM), Datuk Shamshun Baharin Mohd Jamil ke alai kes penyalah makai suap nyadi bala pelajar ke nguji deka pas dalam peresa ba institut pelajar tinggi di menua tu seruran bisi nyadi.
Chairman Parti Keadilan Rakyat (PKR) Sarawak nya madah penyalah makai suap semina ulih nyadi ari penyanggup dua piak, enda sesalah baka betempap dua piak dua jari.
“Ulih piak SPRM mantai sekalika bisi sebarang pengelicha udah diripot sereta dipansik nerima suap ngasuh nembiak pas?
“Atur meseti dipejalai nagang kededua piak ti meri enggau nerima suap nya. Bala pengelicha ke nerima suap kelebih agi ‘khianat’ laban sida tu bisi tanggungpengawa sereta enda ‘profesional’ ngereja pengawa ke tau ngasuh bebadi, munas enggau lesi nyawa.
Nitih ku iya, bisi penurun dalam sistem pelajar, enggau pemanah ulah raban bansa enggau nya standard etika mega sama bela nurun.
“Kitai ninga bala pelajar enggau apai indai bebelika keretas peresa. Staf universiti enggau bala pemansik udah dipadah pasal pengawa nir enggau data palesu. Universiti kitai dulu suba kala pegari nama sereta chukup dipebasa ba rantau tu tang jeman pegari kitai manah lalu udah ngelebus.
Ku Baru, sinu endar lebuh nemu pekara ti enda manah udah ngelekai dalam perintah udah diterenak dalam institusi menua ba pelajar tinggi.
“Bala ketuai kitai patut nyadi teladan tang sida tu enda gawa nitihka jaku. Tang kitai enda ngengetu bisi skandal, ke alai orang ti ngereja nya enda ngaku penyalah diri lalu penulah sida nyadika kalih ngagai tuan sida. Orang ti ngereja penyalah terus lepas nyema sida begempung enggau piak ti ‘betul’.
Ku Baru, inisiatif SPRM ngatur program penyedar patut dipuji tang nyema ketuai raban bansa agi dipeda makai suap sereta nadai penetap/ prinsip, semua program di dunya tu enda ulih meri sebarang pangka.
“Bala nembiak deka belajar ari teladan, lalu teladan tu diayanka ketuai pemasu tinggi ba perintah ti semina ari nerenak ulah ti ‘sinis’ enggau skeptikal ngagai sida.
“Kitai ngemuntanka raban nembiak rebak baru nyema kitai ngemendarka sida ti salah tu megai perintah kitai. Seiti runding kebuah kitai deka angkat ngelaban diatu. Pengawa meresi perintah udah dipejalai nengah chara ngenyit. SIBU: Lebih 450 iku udah mujur niki lalu ngindikka kaki ba tuchung Bukit Sadok kena Hari Lima minggu nyin tadi.
Ekpedisyen diatur begulai enggau Opis Residen Betong, Opis Pelilih Betong enggau Kaunsil Pelilih Betong betuaika Kaban Kunsil Nengeri (ADUN) Layar Gerald Rentap Jabu nya, bedarat ari KM3.4 nengah jalai kampung nurun sereta niki sebuah bukit sebedau ngenataika diri ba tuchung Bukit Sadok pukul 10.45 pagi.
Sebedau ekpedisyen nya berengkah,Sapit Residen Bagi Menua Betong Galong Luang bisi meri penerang sentang mayuh bengkah atur pengelikun ti patut dititih semanjai jalai nya.
Ekpedisyen berebgkah ari SK St John di Nanga Tiga, Sungai Layar nepan kerita 4WD nengah jalai ti udah dibelakin, jalai batu enggau jalai tanah nyentuk ke KM3.4 ka alai semua pesereta bedarat pulai mansang ngagai Kubu Rentap.
Lebuh datai ba tuchung bukit nya, dia lalu dipejalai begulai enggau beberapa tuai rumah ba kandang endur ke besejarah nya.
Tembu pengawa miring, bala peserta lalu dibai merarau seraya beratika pemanah rampa menua ba kandang bukit nya.
Ku Galong, pengawa ninting taun nya dikena meransang pupu bansa rayat ngambika mengenang maik ketuai tauka bujang berani Iban ti tebilang nya ngenanka menua ari Rajah Brooke berengkah ari taun 1941 nyentuk 1961.
Kena 20 Oktober apin lama, pengawa berandau enggau bala tuai rumah peranak menua ngelingi nya udah dipejalaika bekaul enggau perambu perintah ti deka ngangkatka palan besejarah nyadi palan rizab asal menua.