Kes bebunuh ketegal tanah nengenyitka Baru Bian
Tu mandangka agi mayuh pengempu tanah asal NCR bisi penanggul enggau kompeni kebun bedandang besai, batang
KUCHING: Berita pasal suspek betalatka tanah ti ngujungka seiku lelaki parai lalu seiku agi balat bakal udah ngasuh Chairman Parti Keadilan Rakyat (PKR) Sarawak, Baru Bian berasai tekenyit.
Dalam sebengkah penerang kemari, iya madahka penusah nyadi empat bulan pengudah kes bunuh Sekretari PKR Pampang Miri, niang Bill Kayong lalu ngingatka rayat ke alai mayuh pengempu tanah asal agi napi penanggul enggau kompeni kebun bedandang besai sereta batang.
“Sekali tu orang ti parai nya ari kompeni tang pekara tu bekaul enggau pemidang ke enda patut ketegal polisi perintah ti meri empas ngagai pun penatai pemisi enggau pengidup komuniti asal,” ku iya.
Kena Hari Satu, seiku lelaki parai lalu seiku agi bakal ba laya ti nyadi antara dua raban ketegal tanah ba Sungai Arip di Ulu Balingian, Sibu.
Nitihka penerang ti dipadah ngagai The Borneo Post laya pasal tanah udah majak angat dalam kandang beberapa bulan ke udah lalu kededua piak udah nguji deka mutarka nya. Randau pasal nya enda teulihka pemujur kena Hari Satu lalu tu ngujungka seiku ari lelaki udah dibunuh, lalu tuai rumah panjai mega bakal ba penusah ti urung pukul 3
Sekali tu orang ti parai nya ari kompeni tang pekara tu bekaul enggau pemidang ke enda patut ketegal polisi perintah ti meri empas ngagai pun penatai pemisi enggau pengidup komuniti asal. Baru Bian Chairman Parti Keadilan Rakyat Sarawak
lemai.
“Kami betaun udah minta ngagai perintah Sarawak ngambi nitihka undang-undang ba kort sereta ngenuku ‘ pemakai menua’ enggau ‘pulau galau’ sebagi enggau sebidang ari tanah Adat Bansa Asal (NCR).
“Ketegal enda ibuhka pengawa ngenuku tanah NCR ngagai pemakai menua enggau pulau galau, sereta ngemendarka piak bekuasa tanah terus ngeluarka suwa enggau suwa sementara ba tanah NCR, perintah udah nempa penyerekang penemu antara pengempu tanah asal enggau bala kompeni,” ku Baru, ke mega Kaban Kunsil Nengeri (ADUN) Ba Kelalan, madah nyemetak .
Ku iya, ukai semina piak bekuasa majak enda ibuhka undang- undang kort tang sida mega enda japat mutarka penyarut ke nyadi ba pinta NCR.
“Pemuntan ba pengawa mansik enggau jampat udah ngujungka pengempu tanah ti ngasaika diri enda dikeibuh sereta enda bedaya. Nejuka penyerekang penemu diputar antara pengempu tanah enggau kompeni, tebal agi sida tu ngupah bayat ngambika ngemba sida ke ngempu tanah, ti ngujungka sida enda bedaya agi.
“Pia mega atur dipejalaika kort kitai, ti betaun pengelama baru dipending sereta diputarka. Rayat enda ulih ngelempaika pengidup sida ditan bangat ngelama nya, lalu sida enda ulih ditejuka idup nadai temu tungga ba pekara hak ngagai tanah sida.
Nya alai, iya nandu pinta Komiti Hak Tanah ditumbuh tauka Tribunal Tanah, baka ti diperambu Ketuai Akim Sabah enggau Sarawak Tan Sri Richard Malanjum dalam bulan Januari taun tu.
“Pengudah diberi mandat ke tegap ari rayat, aku ngarapka Kepala Menteri Datuk Patinggi Tan Sri Adenan Satem enggau bala kabinet ulih meri pekara tu ngagai sida ke ngempu tanah asal mantaika peminta sida lalu mutarka penyerekang sida enggau jampat.
“Dikearap Kepala Menteri ulih nerima perambu tu dalam Aum Kunsil Nengeri (DUN) ti deka diatur dalam bulan November tu.
“Berebak enggau nya, aku minta pansik silik, jampat enggau lurus dipelajaika bala polis lalu aku pechaya semua piak deka meri kerejasama ngagai raban pemansik,” ku iya.