Perintah dipinta ngemanahka Sepital Kapit enggau naka lengkas
KUCHING: Peranak menua Kapit amat ngarapka Sepital Kapit ulih dikemanah enggau naka pengelengkas, ke pemaik enggau pengelantang raban bansa di kandang menua nya kelebih agi menua ulu.
Ketuai DAP Katibas, Paren Nyawi ngarapka perintah ulih ngemanahka agi perengka guna sepital nya kelimpah ari patut nyendiaka pemesai perubat ba sepital nya.
Nitihku iya, bulan oktober 2013 Opis Menteri Pengerai kala madah, pengawa ngemanahka perengka guna tauka kereban sepital nya dipejalaika bererenggat.
“Taja pia, dalam Bajet 2017 apin lama nadai nyerangkung Sepital Kapit tang semina Sepital Kuching enggau Mukah aja ke nerima belanja dikena ngemanahka kereban tauka perengka guna sepital dalam Bajet 2017 ungkup Negeri sarawak.
“Kitai amat ngarapka pengawa ngemanahka Sepital Kapit ulih dipejalaika enggau lengkas, ke pengelantang raban bansa menua ulu ke agi jauh tinggal,” ku iya.
Paren enda ngenggaika opis menteri nya kala bejalaika sekeda pengawa ngemanahka agi sepital nya baka ‘Unit Kecemasan’ ba taun 2010, Unit Intu Siru (ICU) enggau stor ubat (2011) sereta pengawa ngemanahka dapur enggau Paediatric Isolation Ward ba taun 2012.
Ku iya, Sepital Kapit semina bisi nerima penemuai pemesai perubat pakar dalam bidang perubat enggau bebuntas mit, Otorinolaringologi, Oftalmologi, Ortopedik enggau Psikiatri nitih timpuh ti ditetap.
“Diatu pesakit dianjung ngagai Sepital Sibu laban ke nadai pakar bebuntas mit taja pan bisi disikap palan endur bebuntas, lalu tu mai pengerugi jam sereta ngeruga pengerai pesakit.
“Kebuah pia laban penyauh nganjung pesakit ngagai Sepital Sibu ari Sepital Kapit iya nya dalam tiga jam ngena perau, lalu dipelabaka timpuh pejalai semua deka datai ba Sepital Sibu urung 4 ngagai 5 jam,” ku iya seraya madahka Sepital Kapit entara sepital ke bedau disambung ngena jalai alun.
Nitihka pemadah ari Komiti Sepital Kapit ku iya, urung dua kes dibai ari Sepital Kapit ngagai Sepital Sibu ninting hari,lalu dalam puku rata urung 60 ngagai 70 kes sebulan.
Taja pia tebal agi pesakit enggai dianjung ke Sepital Sibu ketegal pejalai ti jauh sereta bisi penanggul belanja.
Mayuh pesakit ari ruang bilik ke kurang penatai pemisi sereta enda ulih ngeluarka belanja lalu patut disempulang diri sebilik maya diperubatka ba Sepital Sibu, laban tebal sida nya asal lebih ari 300 buah rumah panjai ngelingi Pelilih Song enggau Kapit.
Nambahka nya ku iya nengah aplikasyen WhatsApp madahka, sepital nya begunaka Mesin Pengelansa tomografi Bekomputer (CT Scan) sereta sepital patut bisi digaga jalai pansut ke jalai besai iya nya Jalai Memora, laban ke diatu jalai tama enggau pansut semina nengah jalai ke sama.
Kelimpah ari nya lebuh ke ngenang pasal Bajet 2017, Paren mega madahka diri enda lantang ati ngagai belanja ke diungkup dikena ngemansangka pelajar enggau sekula di nengeri tu.
“Pasal pemansang semua sekula ke udah tuai di Sarawak semina 30 buah sekula aja diungkup ngagai nengeri tu taja pan bisi 183 buah sekula ke patut dikemanahka enggau naka pengelengkas.
“Ungkup nya semina ulih ngemanahka 16 peratus sekula ke patut dikemanahka enggau naka pengelengkas. Nya alai Sarawak anang enda ngambi pulai autonomi pelajar ngambika pemansang modal mensia di Sarawak kelebih agi di menua pesisir ulih chakah dipejalaika,” ku iya.