KGBS nyambut manah bajet 2017

SIBU: Kesatuan Guru Bumiputera Sarawak (KGBS) nyambut manah Bajet 2017 ti dibantaika apin lama udah taja pan enda nitihka pengingin ati sida.

Presidenm KGBS Ahmad Malie madahka sida nyambut baik penyampai agih ti dibantaika dikena neguhka sistem pelajar kelimpah nyendiaka mayuh bengkah insentif dikena ngintu pengelantang nembiak.

“Sekeda ari bantu besekula iya nya sepenyampau RM100 ungkup tetiap iku nembiak ti patut netrima, agih ungkup Program Pemakai Tambah (RMT), bantu oemakai diau ba buding, Skim Simpanan Pendidikan Nasional (SSPN-i) enggau duit turu ungkup ngemanah sereta ngintu manah sekula,” ku iya lebuh dikerandau pengarang berita .

Ahmad madah munyi nya lebuh ditanya sentang penemu KGBS ba Bajet 2017 ti dipejuraika Menteri Datuk Seri Najib Tun Razak kena Hari Lima nyin tadi.

KGBS mega ku iya,bela puas ati enggan pemeri agih belanja ungkup ngemansangka baru sekula primari enggau sekondari ti udah kelalu tuai di menua tu.

Tu nyengkaum ngemanah- ka 30 buah sekula di Sarawak dikena nentuka pengelantang nembiak.

Berebak enggau nya,rambai jaku Bajet 2017 iya nya ‘Menjamin Perpaduan dan Pertumbuhan Ekonomi, Menghemah Perbelanjaan Inklusif, Mensejahtera Kehidupan Rakyat Seluruh’.

Bajet Menua 2017 sekali tu udah ngungkupka sebanyak RM260.8 bilion iya nya nambah 3.4 peratus dibanding ungkup bajet taun 2016.

Ari penyampau nya RM214.8 bilion ungkup Belaja Ngadu Pengawa lalu RM46 bilion agi Belanja Pemansang.