Bomba S’wak suntuk bot penyelamat: Nor Hisham
KUCHING: Opis Penyerara Api enggau Penyah Penusah (Bomba) betapi enggau penanggul bot ti agi kurang kena nyelamat sida ke tasah ampuh bah.
Direktor Bomba enggau Penyelamat, Nor Hisham Mohamad madah naka kediatu, Bomba semina bisi 56 buah bot iya nya nyengkaum ke baru diberi SEDC ngagai Bomba bedau lama.
“Penyampau ke pengabis mayuh diguna iya nya dalam 60 buah bot. Tang naka ke diatu nyengkaum ke baru diberi SEDC, iya nya 56 buah bot,” ku Nor Hisham.
Kilah ensana, Opis Pemansang Ekonomi Sarawak (SEDC) udah meri sebuah bot penyelamat, iya nya bansa bot fibreglass 14’x4’x18” ti bisi ngembuan kuasa injin Mariner 15HP ngagai Bomba.
“Tu nyadi kenang ti pemadu manah ke Bomba ke mantu kami enggau sebuah bot kena mantu sida ke kena tasah ampuh bah,” ku uya.
Nor Hisham madah munyi nya ba aum media beserimbai enggau atur pengawa Nyuaka Bot Penyelamat beserimbai enggau ‘Bulan Kesiapsiagaan Bencana Nasional 2016’ ari SEDC di Indu Opis Bomba ditu, kilah ensana.
Nor Hisham nandu baru, bepelasarka ripot ari Opis Ngemataka Gaya Hari (MET), dipelabaka gaya mua hari dalam kandang diatu ngagai ujung taun tu ila, deka betapi enggau angin La Nina.
“Taja pia, dijangka nitihka ripot MET, angin La Nina enda kelalu bangat, kitai udah nyendia sereta nyikap diri, tang dijangka deka betapi enggau musin ampuh bah baka taun ke udah.
“Tang beratika penanggul gaya mua hari diatu sereta beratika bah ngenyit ke seruran nyadi di sitak Siburan enggau Pelilih Menua Serian, lalu tu sitak ke patut diperatika enggau silik. Pengudah penusah ke nyadi taun siti nyin tadi, kami minta diberi bot Amfibia, nyengkaum kami mega deka nerebaika unit bilun kami mansik sitak ke kena ampuh bah,” ku iya lalu nandu baru, pengawa meresa sitak ke kena ampuh bah ngena unit bilun sigi patut.
Kelimpah ari nya, iya madah bepanggai ba gaya angin, sitak Kuching sereta Samarahan ke suah agi kena ampuh bah ngenyit kelebih agi lebuh ai niki enggau ngenyit.
“Baka di Mukah, ai tasik besai agi sereta ai darat enda ulih nurun, lalu baka ba sitak Pantu, Betong enggau Saratok, taja pan enda betapi enggau ampuh bah, tang suah agi kena tanah tusur.
“Lalu baka nya mega adap ke utara Sarawak, Limbang enggau Lawas, sama betapi enggau ampuh bah nyengkaum di sitak ulu, Long Terawan, enggau Long Panai,” ku iya.
Nya alai ku Nor Hisham, ba renggat pemungkal, dipelabaka bisi nyadi penusah betapi enggau bot ti enda chukup, tang enti nitih proses ku iya, nyema bot enda chukup, Bomba ba sitak nya deka minta bantu palan bomba ke pengabis semak.
“Tang enti ampuh bah masuk hari kedua baka ke kala nyadi di Limbang taun siti nyin tadi, kami minta bantu ari Lawas enggau Miri, kena ngenyukupka bantu kami.
“Naka kediatu, aku muji sida ke nyaup kami baka Bomba Volunteer, ukai semina maya ampuh bah aja sida tu mantu kami, tang sama mantu kami ngaga pengawa bukai, baka nganjung pemakai ngagai sida ke kena tinggang penusah ampuh bah,” ku iya.
Sebedau nya, ba jaku Menijer Besai SEDC Soedirman Aini madahka SEDC enda kala enda ingatka komitmen sida iya ngereja Tanggung Pengawa Rama Korporat (CSR) kompeni nya, alai pengelantang pendiau rayat seruran dijaga.
“Enti nitih, dalam SEDC, kami suah ngatur program CSR ninting taun baka Titian Kasih, Love-in-a Box, Nemuai ngagai Rumah Orang Tuai sereta mayuh CSR bukai, ke nyadi sebagi ari komitmen SEDC ngemanahka agi pengelantang pendiau mensia mayuh,” ku Soedirman. MIRI: Perintah deka berunding ngemasukka projek pemansang Pantai Tusan di Miri dalam tengah penggal Atur Pemansang Malaysia Lumpar Ke- 11 ( RMK11) enggau agih belanja RM5 juta ungkup renggat ti keterubah.
Sapit Kepala Menteri ke lalu nyadi Menteri Dagang Temuai, Seni enggau Main Asal, Datuk Amar Abang Johari Tun Openg madahka agih belanja RM5 juta tu dikena ngemansangka perengka guna infrastruktur ba Pantai Tusan enda nyengkaum bekal ai enggau elekterik.
Iya madahka deka berunding enggau Opis Menteri Perengka Guna Mensia Mayuh Sarawak dikena nyikap perengka guna bekal ai enggau elekterik ba kandang menua nya chara berenggat.
“Kandang menua tu bisi potensi dikemansang enggau penyelai sereta pemanah rampa menua asal ti enda ulih ditemu ba menua bukai baka batu ti nyauka sebaka enggau kuda ngirup ai kelimpah ari ai mata gadung ti mujur matak temuai,” ku iya beserimbai enggau pejalai ngabas Pantai Tusan di Miri bedau lama.
Johari udah nya madahka kandang menua tu deka nyadi seiti ari pematak da- gang temuai kelimpah Pantai Tanjung Bungai, Bakam Point enggau Taman Negara Niah di Sibuti.
“Empat kandang menua tu deka nyadi palan dagang temuai pengudah dikemansang lalu Miri deka nyadi pintu penama adap Utara Sarawak nyadi palan dagang temuai ti tebilang di Sarawak,” ku iya.
Johari madah perintah nengeri mega deka ngeluarka visa penatai di Miri enggau Kompleks Kastam, Imigresyen enggau Kuarantin, CIQ Sungai Tujuh matak mayuh agi penatai bala temuai kelebih agi nengah penerebai ari China ke Miri berengkah bulan Disember tu.
Dulu agi ari nya, ba pengawa ke bukai, iya mega bisi nyuaka perais ngagai bala pesereta ke menang Permy 3 Motocross Challenge 2016 di Miri.
Bisi 4 kategori dipekit ngaul 50 pesereta ari Sarawak, Sabah enggau Brunei Darussalam.
Motocross mega diatur ba Kota Kinabalu Industrial Park, Sepangar, Sabah kena 10 enggau 11 Disember diatur Penampang Motorsport Club enggau kerejasama Opis Menteri Nembiak enggau Lumba Sabah sereta Serakup Automobil Malaysia.