Koperasi pelasar dikena ngemansangka ekonomi
Ngangkatka pengawa besemekih ba dunya dagang sereta ngempung komuniti menua pesisir
ROBAN: Koperasi dipeda ulih dikena ngemansangka ekonomi dalam komuniti menua pesisir lalu ngangkatka pengawa besemekih ba dunya dagang kemaya hari tu.
Kaban Kunsil Nengeri ( ADUN) Kalaka, Datuk Abdul Wahab Aziz madah, kelimpah ari nyadi peransang ngagai ekonomi bala kaban iya, koperasi mega dipeda ulih nyadi pelasar ngempung raban bansa sereta ngadaka penemu bekaul hak orang ti meli barang dikena mutarka penanggul rega barang niki.
Ku iya, koperasi nyadi penyanding penegap ekonomi menua ti ketiga pemadu besai lalu perintah seruran chakah beratika chara ti engkeman dikena ngemansangka koperasi.
“Berindik ari nya, koperasi diperansang ngaul diri dalam sektor ekonomi ti pulaika penguntung ke tinggi kelimpah ari pengawa ngenegapka penau enggau penyikar koperasi.
“Enda ulih dikenggai, koperasi kemaya hari bela bisi mayuh awak enggau potensi nambahka kaul nengah sekeda program pemansang dalam pengawa ti dipejalai,” ku iya.
Wahab bejaku nengah teks jaku iya ti dibacha Pemesai Pelilih Mit Kabong, Kamaludin Haji Alkap rambau Pengerami Bejadika Kedai Coopmart Koperasi Jelupang Roban Saratok Berhad, semak ditu bedau lama.
Ku Wahab, perintah udah bejalaika enam Pekara Asil Aktiviti Ekonomi ti ulih ngasilka penatai penyampau RM50 bilion ngagai sektor koperasi ke mega nambahka Pemansut Kasar Asil Dalam Menua (KDNK) manggai ba taun 2020.
Enam Pekara Asil Aktiviti Ekonomi nya ku iya, iya nya Servis Pekara Wang, Orang Tengah enggau Perunchit, Dagang Temuai, Pengawa Ngintu Diri enggau Pengerai, Pengawa Bumai enggau Industri Betanam Betupi, Kebun Dandang Besai enggau mega Ngemansangka Hartanah.
“Berindik ari nya, dikearap koperasi kitai ulih ngaul diri dalam sektor ke udah disebut nentuka ulih nambahka penatai pemisi sereta meri penguntung ngagai bala kaban iya.
“Bepelasarka bacha, Gerakan Koperasi di Sarawak nyentuk bulan Disember 2015, sepenyampau 931 buah koperasi udah direjista enggau 329,340 iku kaban, enggau syer penyampau RM165.5 juta,” ku iya.
Ba lansa ke bukai, dalam jaku pengelalu iya, Sapit Kepala Koperasi Malaysia (SKM), Basuini Ali ti ngarika Direktor SKM Osman Ismail madah, diatu penyampau aset koperasi di nengeri tu manggai RM562.3 juta enggau asil penyampau RM227 juta.
“Gerakan Koperasi ba Pelilih Saratok dalam bulan Disember 2015, bisi 47 buah koperasi udah direjista enggau kaban penyampau 8,705 iku, lalu syer penyampau RM525,708.60 sereta aset penyampau RM4.02 juta.
“Perintah seruran nyukung langkar pengawa koperasi ngambika nyadi entiti dagang ti produktif, efesyen enggau kompetitif sereta ulih nyaup pemansang menua.
“Berindi ari nya, SKM seruran meransang genap serak komuniti numbuhka koperasi ti bekualiti ba renggat komuniti enggau institusi ngemuntangka pengawa perintah meri perengka guna lalu ungkup pengelantang bala rayat,” ku iya nandu.
Koperasi Jelupang Roban Saratok Berhad tu udah ditumbuh dalam taun 2012 sereta bisi 64 iku kaban rejista.
Sama bisi datai Chairman Koperasi Jelupang Roban Saratok Berhad, Tuai Rumah Steward Belitang sereta urung 150 iku kaban koperasi ke bukai enggau komuniti ke diau besemak.
Berindik ari nya, koperasi diperansang ngaul diri dalam sektor ekonomi ti pulaika penguntung ke tinggi kelimpah ari pengawa ngenegapka penau enggau penyikar koperasi. Datuk Abdul Wahab Aziz ADUN Kalaka