Telang Usan merambu deka ngatur Festival Main Asal enggau Lumba taun 2018
MIRI: Sitak Kunsil Nengeri (DUN) Telang Usan merambu deka ngatur Festival Main Asal enggau Lumba Telang Usan di Miri dalam taun 2018.
Kaban Kunsil Nengeri (ADUN) Telang Usan, Dennis Ngau madah, penemu deka ngatur festival tu datai pengudah ngulu mayuh Hari Diri Sebilik diatur sebuah rumah panjai ari Telang Usan di Miri apin lama ke udah.
Ku Dennis, festival tu dilangkar deka diatur enggau besai sereta richah mungkur mayuh bengkah aktiviti nyengkaum lumba enggau main asal.
“Makin mayuh peranak Telang Usan diau mendam di Miri, nya alai endang patut kitai ngatur festival tu. Berebak enggau nya ulih nyintal pemanah kaul peranak Telang Usan sereta nerenak runding talukka menua asal.
“Kitai merambu iya diatur dalam taun 2018 dikena meri awak ke chukup ngagai peranak rumah panjai nyediaka diri,” ku iya rambau ngulu pengawa ngintu Hari Diri Sebilik Long Bedian ba LA Cottage, Long Bedian, apin lama ke udah.
Sama bisi ngulu pengerami Hari Diri Sebilik tu iya nya Senator Lihan Jok.
Sekeda aktiviti ke dilangkar nyengkaum main bol, badminton, bola keranjang, lumba rayat, main asal baka tanda Datun Julud enggau pekit nebah Sape ke deka diatur ba sekeda palan.
Ba lansa ke bukai, urung 500 iku datai ngulu pengawa ngintu hari diri sebilik ti dirichah enggau mayuh macham pengaw lumbam pekit nginti, chabut tiket benasit, pekit makai enggau tanda panjai.