Program nanam baru sawit deka dipejalaika ba pun taun 2017
KUCHING: Program nanam baru sawit ba kandang endur pemesai 770 hektar di Serian deka dipejalaika ba pun taun 2017 ke dipejalaika dalam Langgur Pemansang Malaysia Lumpar Ke-11.
Menteri Muda Ekonomi Menua Pesisir ( Kandang Menua Ulu) enggau kebun Bedandang Besai, Datuk Francis Harden Hollis madah, projek nanam baru sawit nya deka mungkur estet Kedup I enggau estet Kedup II.
Pengawa nanam baru sawit dipejalaika berindik ari sekeda pun sawit ke ditanam sebedau tu udah tuai sereta patut diganti.
Nitih ku iya, projek nanam baru kelapa sawit di Serian nya deka mungkur pesereta ari lapan buah genturung pendiau.
“Ba Serian, program nanam baru sawit deka dipejalaika ba pun taun 2017 enggau pemesai kandang endur 770 hektar nyengkaum 305 hektar dipejalaika dalam renggat keterubah ba Estet Sawit Kedup I enggau 465 hektar dipejalaika ba renggat keterubah enggau kedua ba Estet Sawit Kedup II.
“Penyampau pengempu tanah ke kena bungkur projek nanam baru sawit renggat keterubah Estet Sawit Kedup I bisi 154 lalu bisi 147 pengempu tanah ba Estet Sawit Kedup II ke dipejalaika dalam dua renggat,” ku iya lebuh ke nyaut tanya tambah ari Martin Ben (BN-Kedup).
Harden meri penerang nya dalam Sesi Tanya Saut maya Aum Kedua Penggal Keterubah, Aum Kunsil Nengeri Ke-18, ke diatur ba Begunan Kunsil Nengeri ditu, kemari.
Dalam sesi ke sebaka kemari, Harden madahka kenyau ari taun 1991 nyentukka diatu bisi pemesai 12,211 hektar ba Serian udah ditanam sawit.
Ba pemesai 12,211 hektar nya mungkur lima buah estet iya nya Kedup I, Kedup II, Mongkos, Taee enggau Melikin.
“Dalam timpuh lima taun ke udah, penyampau asil buah tandan baru (FFB) ari kebun bedandang besai nya bisi 170,261 metrik tan(MT) dalam taun 2011; 162,263 MT (2012); 150,719 MT (2013); 160,018 MT (2014) enggau 170,201 MT ba taun 2015,” ku Harden.