Thomas Ling madahka PAHLAWAN enda diterima di Sarawak
KUCHING: Gerempung Soldadu Veteran Malaysia Nengeri Sarawak (PVTMS) madahka PAHLAWAN (Gerempung Ex-Raban Pegelikun Malaysia) tau enda ibuh ngerembaika sayap sida iya ngagai Sarawak, tauka meri penemu pasal T5P.
Presiden Gerempung Veteran Soldadu Malaysia Nengeri Sarawak (PVTMS) Thomas Ling Kui Eng madah, tu laban gerempung veteran Sarawak nemu utai ke patut diangkatka enggau pengawa ke manah ungkup veteran di Sarawak.
“PAHLAWAN ukai sebuah gerempung ti bejalaika aktiviti veteran ke direjista, tambah mega gerempung nya bedau direjista nengah Genteran Tusun Ukum veteran 2012.
“Gerempung ke bisi di nengeri Sarawak seruran beratika pengelantang pendiau raban veteran Sarawak lalu enda begunaka pemendar PAHLAWAN nyadi gerempung ti ngarika sida,” ku Ling madah ba aum media ba sebuah hotel ditu,kemari.
Gerempung veteran/kelab soldadu ku iya, bisi ngulu aum di Hotel Royale Chulan Kuala Lumpur begulai enggau Menteri Ngetanka Menua kena 15 Jun 2015, udah nerima 12 iti resolusyen.
Resolusyen nya nyengkaum ngerapitka tikas bida pinchin entara veteran ke udah pinchin sebedau taun 2004 enggau ke udah pinchin pengudah taun 2004, ngemanjaika timpuh meri pinchin ti diberi ngagai bini ke ditikah veteran dalam kandang pinchin ari 20 taun nyentuk 45 taun.
Nangkanka nya ku iya, meri belanja tetap ninting bulan ngagai veteran ke enda pinchin, nyaga pengelantang pendiau ex-soldadu ti diketu ketegal disiplin (meri pegelantang perubat enda bebayar sereta bantu pelajar ngagai anak sida), ngemaruka pengelantang berubat ba pakar HAT ATM (kelebih agi di HAT Tunku Mizan, Kuala Lumpur), nyengkaum nikika penyampau pinchin ke diberi ngagai veteran ke timpang pendiau tauka bakal maya operasyen sereta latih maya perintah bekurung.
Nangkan nya, ku iya, mutarka penanggul veteran ke lalu bedau bisi rumah kediri empu (rumah keterubah), perengka guna bantu pelajar ngagai anak veteran ke masuk Palan pelajar Tinggi IPTA dikerembaika ngagai sida ke masuk IPTS.
Lalu empat ke penudi, ngemasukka nama bini ti ditikah veteran dalam timpuh pinchin ngagai kad ex- soldadu ti dikeluarka JHEV, meri kelala setipikit enggau diploma ti dikeluar PERHEBAT, ejensi perintah enggau kompeni peribit (sadang nikika PERHEBAT) ngagai Kolej Universiti enggau Universiti), meri gelar midul dibasa (Atur Khas ti silik enda tau enda digaga) sereta ngemendarka baju ‘istiadat’ ungkup pemesai ti pinchin bepangkat Briged Jeneral ke atas dikena enggau pemesai ti pinchin bepangkat kolonel nyentuk kapten, ku Ling.
Ku iya baru, perintah udah ngambi atur ke positif sereta begunaka timpuh mansik semua perambu ti dibantaika, dikena ngemanahka agi Veteran Raban Soldadu Malaysia (ATM).
“Kelimpah ari nya, JHEV mega bisi ngangau tuai peme- sai gerempung ari 72/91 buah gerempung veteran/ kelab datai baum pasal pekara ti bisi dipejurai dikena ngemanahka agi pengidup raban veteran, di Kuala Lumpur bedau lama tu tadi.
“Kami gaga ati enti sema PAHLAWAN direjista nengah genteran tusun ukum Veteran 2012 nyadi sebuah gerempung veteran, ngambika sama ulih mantaika penemu lalu negika gerempung tauka raban veteran di serata menua Malaysia, bejurai sereta mutarka semua T5P ke bisi dibantaika lalu kami tau enda ibuh ngaga pengawa pemandang di serata menua,” ku iya.
Sama bisi enggau datai kemari, Mandal Pesiden Gerempung Veteran Sol- dadu Kor- Ranger, Lt Kol ( B) Fabian Wong, Sekretari Besai, Gerempung Veteran Sarawak Rangers, Kapt ( B) Mohd Johari Ibrahim, chairman Gerempung Veteran Soldadu Nadai Pinchin, Abdul Rahman Sapawi.