Michelle Thomas mujur bulih gelar Kumang Serakup Raban Ngepan Iban
MIRI: Indu misi beumur 25 taun ari Sibu, Michelle Thomas Magal, mujur mekit 14 iku pesereta ke bukai ngerebut gelar Kumang Serakup Raban Ngepan Iban (PRNI) ke udah tembu tengah malam kilah ensana, ke diatur ba sebuah hotel tebilang ditu.
Michelle ke bulih gelar Kumang mega pulai ngemai perais mata duit RM1,500 disempulang jumpang, selampai, bungai, trofi, jam, perengka penganta dipelanja Nori Skincare enggau setipikit penyereta.
Lalu gelar Lulong tauka lumur dua dipenggi Nisya Sukri, 19 taun, penakan Iban enggau Melayu. Iya pulai ngemai perais mata duit RM1,000 besereta trofi, setipikit penyereta, selampai, bungai, jam enggau perengka penganta Nori Skincare.
Gelar Selingkar Matari tauka penuduk lumur tiga, Beatrice Geraldine Ringkai, 24 taun, mega peranak asal Sibu lalu gawa nyadi Pemantu Perubat.
Beatrice pulai enggau perais mata duit RM700, setipikit, selampai, trofi, bungai, jam sereta perengka penganta Nuri Skincare.
Seraya ba penuduk lumur empat iya nya Avchie Kulan Tuan, 23 taun ari Lubok Antu lalu kelima, Roseda Ancha, 27 taun, ari Miri, bela nerima perais mata duit RM200 enggau RM150, setipikit, selampai, trofi, bungai, jam enggau perengka penganta Nuri Skincare.
Bisi 15 iku pesereta ngambi bagi dalam pekit Kumang RNI ke diatur Serakup Raban Ngepan Iban (PRNI) beserimbai enggau pengerami ngelanchar serakup nya ke udah bulih pemendar ari Opis Pengere- jister Gerempung (ROS) dalam bulai Julai tu tadi.
Presiden PRNI, Stephen Abas madah kelelima pesereta tu terus dibai ngagai pekit renggat nengeri ke deka diatur ba taun baru, beserimbai ngintu pengerami Gawai Dayak.
Nitih ku iya, tuju PRNI ditumbuh kena ngentap sereta ngenegapka agi pengawa ngintu pekayan-pekayan asal Iban sereta adat enggau main asal bansa Iban, ngambika enda punas enggau lenyau penulin iya nyerumba ubah dunya.
Ngelansa pengerami lemai nya ti udah dipenyadi kaban Komiti Tetinggi Parti Rakyat Sarawak (PRS), Alexander Donald, ti ngarika Kaban Kunsil Nengeri ( ADUN) Samalaju, Majang Renggi.
Majang, dalam jaku dipansutka iya muji pengawa dipejalaika PRNI, diperati ulih ngetan sereta mulaika baru pengawa ngintu main asal, kelebih agi pekayan asal bansa Iban, ba pelasar ke betul, dikena nyeliahka iya terus dikeruga main moden ke dibai ari menua luar.
“Enda ulih dikenggai, pengawa asal kitai kemaya hari, majak lenyau ketegal budaya ari menua luar, kelebih agi budaya moden ke majak munaska penulin, asal enggau penyelai iya,” ku iya nerang.
“Berindik ari nya, serakup baka PRNI tu ditumbuh, negika pekara tu seraya ngelakuka iya ngagai menua luar, sebagi ari pengawa ke chukup dipuji sereta diperansang,” ku iya.
Nya alai, kelai sukung iya, Majang nengah pengari iya kemari, ngemendarka belanja penyampau RM7,000 ungkup PRNI, dikena nyaup belanja aktiviti enggau pen- gawa dipejalaika sida.
Berebak enggau nya, Majang mega meransang PRNI ngambika kreatif agi nempa penyelai enggau pemanah pekayan asal Iban, nyadi seiti produk ke ulih dijual ukai semina dalam menua tang mega di menua luar, lalu tu ulih ngemai bansa Iban dikelala ba menua luar.
Ba lansa ke bukai, bisi 15 iku pesereta ngambi bagi dalam pekit Kumang RNI, udah dilis ngagai 10 iku pemadu nyulut lalu lima iku ke nyulut sebedau dibantai nyadi pemenang.