Masing: Sarawak udah teulihka penyulut ba pengawa berunding enggau Perintah Besai
KUCHING: Sapit Kepala Menteri Tan Sri Datuk Amar (Dr) James Jemut Masing madahka penyulut besai ke udah dijapai Perintah Nengeri enggau Besai iya nya bekaul enggau autonomi enggau nyerahka kuasa ngagai Sarawak.
Renggat keterubah pengawa berunding enggau Perintah Besai ti teulihka penyulut ku iya, mayuh agi peluang diberi ngagai peranak Sarawak gawa ba opis perintah besai enggau sekula, operasyen PETRONAS di Sarawak.
Nambahka penyulut ba renggat keterubah mega nyengkaum ngenegapka pemesai undang- undang nengeri ari ketuai akim perintah besai awakka ulih nawa penyalah ti ngelanggar undang-undang nengeri.
“Penyulut bukai ba renggat keterubah berunding enggau perintah besai nyengkaum projek pemansang menua pesisir baka bekal elekterik menua pesisir ari ejensi nengeri baka Sarawak Energy Berhad sereta ngatur belanja ari perintah besai dikena ngemansangka projek Jalai Besai Pan Borneo.
“Renggat kedua (pengawa berunding enggau perintah besai) bekaul enggau geran khas enggau asil penatai bukai baka ke ditulis dalam Jadual 10 Konstitusyen Perintah Besai ngagai nengeri, minyak enggau gis, undang-undang, pelajar enggau latih, undangundang pekereja anak kompeni dikena napi peminta makit enggau kebukai,” ku iya.
Masing mansutka pekara nya dalam sebengkah penerang di baruh Perintah Tetap 11(1)(i) ke dibacha begulai enggau Perintah Tetap 22 (DUN) ti dibacha ba Aum Kunsil Nengeri ke diatur, kemari.
Bejaku baru iya madahka Rang Undang-Undang Nyadung Gis 2016 ti dipejuraika sereta udah dikemendarka Kunsil Nengerikena Hari Satu tu tadi ti nyadi manifestasi penyulut ke udah dijapai Sarawak.
Diatu Sarawak agi nganti ripot komiti teknikal pasal pekara besai ti bekaul enggau isu duit sereta minyak enggau gis, ku iya.
“Menteri Besai (Datuk Seri Najib Tun Najib Razak) ba mua mensia mayuh ba sebengkah pengerami di Kota Kinabalu kena 12 November tu tadi, madahka diri sedia berandauka Sempekat Malaysia 1963 enggau nadai sebarang penyaru ti diungkupka dalam konstitusyen.
“Iya (Najib) madahka diri enda ngambi hak Sabah eng- gau Sarawak tang deka ngetanka nya. Iya setuju enggau Rang Undang-Undang Nyadung GIs 2016 dibataika dalam Kunsil Nengeri tu,” ku iya.
Bejaku baru Masing ti mega ADUN Baleh madahka rayat Sarawak udah diberi mandat ti nyata sereta tegap ngagai perintah nengeri dikena ngelindung autonomi enggau ngelindung konstitusyen pasal hak enggau pemerat khas nengeri tu.
Iya arap bendar sereta nyamin pengarap enggau mandat ke diberi rayat ngagai perintah nengeri enda dipenyati.
Tambah mega ku iya, enggau jamin ari Najib ‘pintu’ iya seruran ditukang endur berandauka pengirau rayat nengeri tu pasal hak Sarawak ti majak ‘luya’ ketegal penyaru ba MA63, perintah nengeri deka terus beserakup enggau perintah besai dikena ngenukuka nyapai asil positif.
“Tu proses ke panjai sereta ngasuh lelak, lalu Kepala Menteri udah kala ngingatka rayat Sarawak.
“Tang, Perintah Nengeri deka enggau pengabis manah sereta naka ulih ngemenuhka juluk rayat Sarawak ti deka ngasaika autonomi baka ke dalam Konstitusyen Perint ah Besai ke ngembuan status ti sah dalam Gempung Malaysia,” ku iya.