PVTMS merambu deka numbuhka GGVTMS
Dikena ngenegapka penyerakup enggau semua gerempung soldadu bukai di nengeri tu
KUCHING: Gerempung Soldadu Veteran Malaysia Nengeri Sarawak (PVTMS) deka numbuhka gempung gerempung veteran di Sarawak ngambika ulih dikena nempa kerejasama sereta ngetanka kaul enggau semua gerempung soldadu bukai ke bisi di nengeri tu.
Presiden PVTMS, Thomas Ling Kui Eng madah kemari, batang tuju ngaga aum media nya laban deka mantaika dua iti pekara, iya nya deka Numbuhka Gempung Gerempung Soldadu Veteran Sarawak (PVTMS) lalu mantah propaganda PAHLAWAN (Ger- empung Ex-Raban Pegelikun Malaysia) ngagai Veteran Sarawak sereta Nyerahka Memorandum T5P ngagai Kepala Menteri.
Ling madah, naka ke diatu bisi 4 buah gerempung ke udah direjista ari baruh Seksyen Tusun Ukum Veteran 2012.
Empat buah gerempung ke udah direjista ba Opis Pekara Bekaul enggau Veteran (Opis Hal Ehwal Veteran tauka JHEV) mungkur PVTMS, Gerempung Veteran ExKor Renjer ( PVTVKR), Gerempung Veteran Nadai Pinchin ( PVTTB) enggau Gerempung Veteran Sarawak Ranger (SRVA).
“Semua Veteran Raban Soldadu Malaysia ( ATM) Nengeri Sarawak enda tau enda begempung ngambika ulih nyamin gaya pengidup veteran soldadu di nengeri tu jemah ila.
“Berindik ari nya, Gempung Gerempung Veteran Soldadu Nengeri Sarawak ( GGVTMS), berat endar ngenegapka penyerakup sereta kerejasama enggau semua Gerempung Soldadu Veteran Sarawak,” ku Ling.
Iya madah munyi nya, lebuh nyadi chairman aum media ke bela digulu sekeda gerempung veteran bukai, di sebuah hotel ditu, kemari.
Iya madah, pengudah GGVTMS nya ditumbuhka ila, semua pangku pengawa dalam gerempung nya deka diarika semua gerempung ke udah direjista nyadi kaban.
“Tu mandang kelai ti manah ngagai semua tuai pemesai gerempung soldadu veteran nengeri tu ngambika berakup sereta negika Veteran Raban Soldadu Malaysia (VATM), kelebih agi di nengeri Sarawak,” ku iya.
Tu mandang kelai ti manah ngagai semua tuai pemesai gerempung soldadu veteran nengeri tu ngambika berakup sereta negika Veteran Raban Soldadu Malaysia ( VATM), kelebih agi di nengeri Sarawak. Thomas Ling Kui Eng Presiden PVTMS