Chong enda dikemendar ngulu aum DUN ke sekali tu
KUCHING: Chong Chieng Jen (DAP-Kota Sentosa) enda dikemendarka ngulu Aum Kunsil Nengeri (DUN) belabuh ari lemai Hari Satu tu tadi, ketegal jaku iya ti enda belebas ti madahka RM250 juta dikena ngaga Projek Mit Pemansang Menua Pesisir (MRP) 2015 ‘nyata endar udah lenyau lalu enda dikira sekali’.
Speaker DUN Datuk Amar Mohd Asfia Awang Nassar madahka jaku tuduh ti enda belebas ari chong nya ‘enda dikemendar’ ari baruh Perintah Tetap 32(6) lalu leka jaku ke dikena (‘nyata endar udah lenyau lalu enda dikira sekali’) enda diterima nengah Perintah Tetap 40(3)(c).
“Kaban Kunsil Nengeri (ADUN) Kota Sentosa enda dikemendarka enggau baum DUN ke sekali tu ketegal iya (Chong) enggai narit pulai baru perambu ke udah disebut iya ti minta Kepala Menteri (Datuk Patinggi Tan Sri Adenan Satem) mantaika akaun ti silik pasal semua wang turu MRP ke sepenyampau RM905,900.00, ti udah dikemendarka Dewan Kunsil Nengeri ba taun 2015.
“Iya enda dikemendarka enggau baum DUN laban sebedau penerang silik pasal akaun dibantaika Kepala Menteri ke mungkur semua duit turu nya...Chong udah enda belebas nuduh lalu madahka RM250 juta ungkup MRP 2015 ba jaku iya ‘ nyata endar udah lenyau lalu enda dikira sekali,” ku iya madah ba aum media ti diatur ba kompleks DUN ditu, kemari.
Ku Asfia, iya udah suah meri peluang ngagai Chong narit pulai baru jaku tuduh ari perambu nya, awakka perambu nya ulih diperunding bepelasarka merit lalu dikejakuka Dewan.
“Laban iya (Chong) milih enggai narit jaku pulai iya, aku mutuska nengah Perintah Tetap 40 (3) lalu Menteri Wang Kedua, Dato Sri Wong Koh mantaika perambu enda ngemendarka Chong datai baum DUN sekumbang timpuh aum DUN dipejalaika, iya nya ari 21-30 Nov tu. Ku iya.”
Nya alai ku iya, jaku chong ti madahka iya ditagang nurun baum DUN ketegal enggai narit pulai baru perambu iya nya enda amat lalu tau ngasuh orang saru.
Taja pia ku iya, taja pan Chong enda dikemendarka enggau baum sekumbang aum DUN ke sekali tu, Asfia madah pekara bekaul enggau ‘RM250 juta nyata endar udah lenyau lalu enda dikira sekali’ jaku tuduh nya digaga ulih orang ke enda mereti pasal Atur Perbendaharaan 6(ii).
Iya madah ari baruh Atur Perbendaharaan 6( II) ‘ sebarang tuju duit ti diungkupka deka diserah pulai baru ngagai Wang Turu ke Digumpul Sekali, enti sema enda dibelanja ke sesebengkah tuju dalam timpuh ti udah ditetapka’.
“Reti nya, enti duit ti diungkup ke tuju nya ke enda dikena deka dipulaika baru ngagai Wang Turu ke Digumpul Sekali, nyadi ungih belanja RM100 juta, RM80 juta ari ke dikena, lalu laluh RM20 juta deka dipulaika baru ngagai Wang Turu ke Digumpul Sekali.
“Labanbisi maya ungkus ke endar jauh baruh agi ari ke dianggar ungkup sesebengkah projek, projek laun dipejalai ketegal sekeda penanggul ti ngujungka ungkup belanja nya enda dikena ,” ku iya.
Jaku tuduh Chong dalam perambu nya ku Asfia (21 November 2016) enda belebas laban RM250 juta nya ‘enda lenyau’ lalu semua ungkup belanja ti enda dipulaika baru ngagai Wang Turu ke Digumpul Sekali (nengeri) nitihka Seksyen 4 Akta Prosedur Kewangan 1957 enggau Atur Perbendaharaan 6(ii).