Lapan mosyen ari penyakal enda diterima ba Aum Kedua Penggal Keterubah DUN Ke-18
KUCHING: Kunsil Nengeri kemari enda nerima semua lapan iti mosyen ke dibanataika penyakal dalam Aum Kedua Penggal Keterubah Aum Kunsil Nengeri Ke-18.
S p e a k e r K u n s i l Nengeri, Datuk Amar Mohamad Asfia Awang Nassar madahka tiga ari lapan mosyen nya dibantaika See Chee How ( PKR- Batu Lintang), Chong Chieng Jen (DAP-Kota Sentosa) enggau Baru Bian (PKRBa’Kelalan) bekaul enggau isu IN PARI MATERIA ke alai dalam jaku Latin reti nya ‘In the same matter’.
Asfia madahka isu ke dibantaika nya udah diaduka Sapit Kepala Menteri ti mega Kaban Kunsil Nengeri (DUN) Baleh, Tan Sri Datuk Amar James Jemut Masing dalam penerang iya.
Nengah pengarap penuh ke diberi ngagai Perintah Nengeri enggau nadai timpuh ditetapka, Perintah nengeri deka terus berunding enggau Perintah Barisan Nasional ( BN) bekaul enggau pekara ke dibantaika nya.
Perintah Nengeri deka ‘continues effort to pursue’ ke udah diterangka dalam mosyen ti dibantaika Kaban Kunsil Nengeri ( ADUN) Semop kena 6 Mei 2014 baka ke diripot ba lambar 30 ba Official Hansard Mei 2014.
Asfia madah, tiga mosyen nya enda ulih dipajakka. Enti mosyen tu dipajakka nya deka ngelanggar ‘Outstanding Order 22’ iya nya enda ngemendarka sebarang sapa bejuraika pasal pekara ke diterangka.
Kelimpah ari nya, mosyen keempat tauka mosyen kedua ari Chong Chieng Jen (DAPKota Sentosa) enda diterima Kunsil Nengeri bekaul enggau isu 450 juta ‘standard cubic feeds’ subsidi gas asal.
Mosyen kelima bekaul enggau Seksyen 25(3) Ordinan Opis Bekuasa Kandang Menua 1996, ti dibantaika Dr Ting Tion Choon (DAPPujut).
Kebuah enda diterima Kunsil Nengeri ku Asfia, laban Kaban Kunsil Nengeri Pujut nya enda dikemendar menteri ke bekaul dikena napi peminta ‘proviso’ baka ti dipinta dalam Seksyen 25(3). Nya alai Kunsil Nengeri enda nerima, ku Asfia.
Nambahka nya mosyen keenam iya nya bekaul enggau isu penyambung enggau perengka pengangkut nyengkaum jalai alun, jematan enggau jalai kereta api dalam Rintai Federal ari baruh Jadual 9 Konsitusyen Perintah Besai (artikel 74, 77) ke dibantaika David Wong Kee Won ( DAP- Palawan), mega enda diterima Kunsil Nengeri.
Dua mosyen ke dibantaika Irene Mary Chang Oi Ling ( DAP- Bukit Assek) iya nya bekaul isu pengelikun ke dari baruh perintah besai sereta isu ti minta semua pengari rayat patut diberi geran ke sebela enggau enda ngira bagi parti politik.
Taja pia kededua mosyen ti dibantaika Chang nya enda diterima Asfia laban isu nya udah disaut Sapit Menteri Besai maya aum parlimen, lebuh ke nyaut tanya ari Kaban Parlimen Lanang.
“Mosyen tu patut enda diterima laban ngelanggar Standing Order 23(4)(a) bekaul ngiga geran, chaj tauka belanja duit rayat, kelimpah ari bisi dipinta perintah ngena chara betulis ari Menteri ti megai tanggunpengawa nya,” ku Asfia.