Perintah Nengeri agi ngetanka flat suwa nyadi rumah transit ke disuwa

KUCHING: Menteri Muda Kandang Mengeri Datuk Talib Zulpilip madahka Perintah Nengeri agi nyadika flat suwa nyadi rumah transit ke disuwa ngagai raban ke kurang penatai pemisi.

Iya madahka Opis Pemansang Pengawa Berumah (HDC) bisi dua skim flat iya nya disuwa enggau dijual.

“Bekaul enggau flat suwa ke endang udah bisi, naka ke diatu Perintah Nengeri agi ngetanka status flat suwa nyadi rumah transit ke disuwa.

“Kebuah pia laban agi mayuh peminta ari raban ke kurang penatai pemisi, ke bedau ulih meli rumah sereta enda ulih nginjau duit dikena meli rumah,” ku iya.

Talib mansutka penerang nya lebuh ke nyaut tanya ari Fazzrudin Abdul Rahman ( BN- Tupong) maya Sesi Tanya Saut ba Aum Kedua Penggal Keterubah, Aum DUN Ke-18 ke diatur ba Begunan Kunsil Nengeri (DUN) ditu, kemari.

Kelimpah ketegal tusah deka nginjau duit, penyuwa nya deka agi meli rumah atas tanah dibandingka enggau rumah flat.

“Penyuwa nya mega deka agi nyuwa laban ungkus nyuwa ti murah iya nya RM150 sebulan lalu palan flat suwa nya mega semak sekula enggau endur gawa,” ku iya.

Taja pia ku iya, HCD bisi flat khas ke tau dijual baka ba Taman Sri Makmur, Matang Batu 6 bisi lima stok; Taman Sri Harmoni, Matang Batu 8 (15); Taman Sri Jaya, Matang Batu 9 (9); Taman Malihah II, Taman Malihah (76); Taman Sri Cahaya, Tondong (10) enggau Taman Sri Muhibbah, Batu 13 bisi sebuah (1) stok.

Nambahka nya iya madah, bisi 116 stok flat ke dijual tauka ulih dibeli ti agi puang lalu bisi 74 stok flat ke ulih disuwa ke agi puang baka ba Taman Dahlia, Batu gong, Rantau Panjang RPR Siburan enggau Taman Sepakat Jaya.

“Perambu meri peluang ngagai penyuwa meli (flat) nya perambu ke manah. Nya deka diperunding pengudah sebengkah pansik silik dipejalaika,” ku iya lebuh nyaut tanya Tambah ari Fazzrudin.