Ng Budu diperambu nyadi Palan Endur Meri Servis
Deka dipejalaika nengah Agenda Transformasyen Nengeri mungkur kandang menua Ulu Krian/Budu
KUCHING: Perintah Nengeri nengah Agenda Transformasyen Nengeri merambu deka ngaga Pelilih Mit Menua Nanga Budu nyadi sebuah Palan Endur Meri Servis ke baru.
Menteri Muda Perengka Pengangkut Sungai enggau Pengelikun, Liwan Lagang madahka Palan Endur Meri Servis ke baru nya deka nyendiaka servis mungkur kandang menua Ulu Krian/ Budu.
“Perintah Nengeri nengah Agenda Transformasyen Nengeri udah merambu deka ngaga Nanga Budu nyadi se- buah Palan Endur Meri Servis ke baru ba kandang menua Ulu Krian/Budu.
“Entara komponen ke disediaka ba palan nya nyengkaum Begunan Opis Pelilih Baru enggau rumah endur pengereja pengawa opis perintah.
“Palan nya deka digaga ba tanah pemesai 50 hektar, ke udah ditemu endur,’ ku iya.
Liwan meri penerang nya lebuh iya ke nyaut tanya ari Ali Biju ( PKR- Krian) dalam Aum Kedua Penggal Keterubah, Aum Kunsil Nengeri (DUN) Ke-18 ke diatur ba Begunan DUN ditu, kemari.
Bejaku baru iya madah, kandang Ulu Krian/Budu/ Ulu Awik mega disengkaum dalam Agropolitan Gunong Sadok ke alai diatu tanah pemesai 349 hektar (ari pemesai semua 6,499 hektar ti udah dikelala) di Ulu Awik udah dikemansangka getah ti dipejalaika RISDA.
Ku iya, perintah mega deka ngemanahka jalai alun ke udah bisi ke nyambung ngagai Ulu Krian/Ulu Paku/ Pakan ngambika ulih mantu nyungkak penumbuh sosioekonomi dalam kandang menua nya.
Kelimpah ari Liwan lebuh ke nyaut tanya ari Mohammad Razi Sitam (BN-Saribas) bekaul enggau projek jalai alun enggau ngaga jematan konkrik Sungai Sawit ari Tanjung Asam ke Kpg Buda, iya madahka projek nya benung dipejalaika.
“Pengawa ngaga jematan konkrit sungai Sawit diatu nitihka timpuh ke ditetapka enggau tikas pemaju fizikal diatu sepenyampau 50.2 peratus.
“Ungkus semua ngaga projek nya RM9.2 juta lalu nyema nadai penanggul projek nya deka tembu dalam bulan April 2018,” ku iya lebuh ke nyaut tanya tambah ari Razi.
Perambu ngemanahka Jalai Ban DID ari Kpg Tanjung Assam ke Kpg Buda ku iya, deka dikenataika baru dibaruh RMK11 Rolling Plan 3.
Perintah Nengeri nengah Agenda Transformasyen Nengeri udah merambu deka ngaga Nanga Budu nyadi sebuah Palan Endur Meri Servis ke baru ba kandang menua Ulu Krian/Budu. Liwan Lagang Menteri Muda Perengka Pengangkut Sungai enggau Pengelikun