SK Tulai mujur ngatur Pengerami Sukaneka PIBG 2016
BINTANGOR: Sekula Primari (SK) Tulai, Bintangor udah mujur ngatur Pengerami Sukaneka Gerempung Apai Indai enggau Pengajar (PIBG) 2016, kemari.
Taja urung dua jam pengerami tejanggal ketegal hari ujan tang bala apai indai nembiak mengkang datai meri sukung ngagai program sekula nya.
Chairperson Gerempung Apai Indai enggau Pengajar ( PIBG) sekula nya Freda Jelong ba jaku pengelalu iya meri besai terima kasih ngagai bala apai indai ti bisi datai.
Iya madah, penatai nya tampak mandangka sukung ari piak apai indai nembiak ngagai pengajar sekula nya.
“Ukai semina sukung ari pekara pelajar tang sukung ngagai program sekula baka tu mega nentuka pemujur sekula kitai ba pelajar enggau kokurikulum,” pia ku iya madah.
Kepala Pengajar SK Tulai Kuah Rames maya dipebasa bejadika pengerami nya bela sepenemu madahka sukung baka ke dibantai sehari nya (kemari) nyadika pelasar ngagai pengering sekula enggau pengajar ngembing nembiak ngulihka pemujur sekula.
“Seraya tu mega kaul entara bala kitai apai indai, pengajar enggau sekula ulih disintalka agi,” pia ku iya madah.
Ngena awak nya, iya ngarapka bala apai indai semampai ulih ngenataika diri maya sekula bisi program nyema nadai penanggul ke bukai.
Maya pengerami tu macham pekit bisi diatur ke diungkup ngagai bala apai indai nembiak.
Sekeda ari pekit ke bisi diatur iya nya baka pekit belanda (4×100 meter), ‘lontar peluru’, nendang bol sapa jauh, batak tali enggau macham bengkah main sukaneka ke bukai.