Perambu Rang UndangUndang Nyadung Gis 2016 udah dikemendarka DUN
KUCHING: Kunsil Nengeri (DUN) udah ngemendarka perambu Rang UndangUndang Nyadung Gis 2016 ti dibantaika Menteri Perengka Guna Mensia Mayuh, Datuk Seri Dr Stephen Rundi Utom.
Berindik ari pemedar rang undang-undang nya, semua pengawa ke bisi bekaul enggau nyadung tauka nyadung gis deka diberi lisin ari menua tu nengah Direktor Penyadung Gis.
Pengawa tu nyengkaum pengawa ngimport Liquefied Natural Gas (LNG) ke Sarawak, regasifikasi, chara proses gis, pengangkut, bekal sereta rega makit gis, ngaga, ngatur sereta mutarka paip gis, terminal, loji enggau perengka guna.
Pengawa magi tauka nyadung gis nya nyengkaum gis asal, Liquefied Natural Gas (LNG), gis petroleum (LPG), gis ke dikena industri ti ngena teknologi besai sereta sepital.
“Ordinan Servis Mekal Gis (Kompeni Ti Bejalaika Pengawa Nya), 1995 deka dipunaska tang pengawa dipejalai nengah ordinan tu nyengkaum mantaika aset sereta retanah ba Sarawak Gas Distribution Sdn Bhd (SGD) enda dikachau taja pan ordinan tu dipunaska.
“SGD naka ke diatu, nyendiaka paip gis ngagai urung 22,000 penguna domestik, komersial sereta industri di Miri, deka terus nyendiaka gis ngagai orang ti nguna ngena penyampau rega nitihka rega baka ke diatu sereta nitih sempekat entara SGD enggau penguna tu.
“SGD deka terus nyambung pengawa tu kelebih agi ba pengawa magi gis di Sarawak lalu Petronas ke nyadi pengeluar sereta pemekal ke pengawa magi gis di Sarawak deka nitihka undang-undang baru tu,” ku Dr Rundi madah lebuh macha perambu ke-3 di DUN.
Iya nandu baru, taja pan undang-undang ba pengawa magi gis tu udah dipejalaika, ukai reti Perintah Nengeri enda kiruhka Sempekat Petroleum ti disain kena 27 Mac 1975 entara Perintah Menua enggau Petronas, ti nyadi sebagi ari asil Petronas dikena mayar royalti 5 peratus ngagai Sarawak.
“Perintah Nengeri ngenuku pengawa Petronas ke nyadi gerempung minyak renggat menua dalam pemansang industri minyak enggau gis di Malaysia sereta sukung enggau bantu sida iya ngagai ekonomi menua,” ku iya.
Berindik ari gis asal ke muntang diulih, Perintah Nengeri ku Rundi deka beratika pemerat bekaul pekara tu dikena ngangkatka pemansang pengawa industri di Malaysia.
Kelimpah ari nya, Perintah Nengeri deka seruran ngemataka tikas pemansang industri gis di nengeri tu ngambika semua kompeni gis ke bisi di Sarawak sama bela begulai ngemansangka ekonomi tang tetap nitihka atur ke udah diletak ungkup pekara ti bekaul di menua tu.
“Perintah Nengeri mega deka beratika penumbuh industri gis di Sarawak, nengah meda mayuh agi kompeni Sarawak sama enggau ngemansangka industri tu lalu baka nya mega ke bukai ti bisi enggau ngemansangka industri gis, Petronas nitihka undang-undang menua tu,” ku Rundi nyemetak.
Ba kenang ti sebaka, undang-undang tu deka belabuh diterit pengudah tusun pengawa magi gis di Sarawak udah diputuska lalu direktor ungkup pengawa magi gis tu udah dichiri.