Kerejasama ngiga peranak Australia ke tesat nerima puji ari perintah menua nya
MARUDI: Kerejasama rat entara komuniti enggau piak polis sereta ejensi perintah ke bukai dalam operasyen nyidi enggau nyelamat (SAR) orang lenyau, iya nya peranak Australia ke tesat ba Taman Negara Gunung Mulu dalam bulan nyin tadi, nerima puji ari perintah menua Australia ti dikenatai nengah Pesuruhjaya Tinggi Australia ngagai Malaysia enggau Konsulat Australia di Kuching, Datuk Dr Philip Ting.
Dr Ting mega muji pengawa enggau penyiru raban penerit adat ti udah ngaul diri dalam operasyen diketuaika raban polis ari Pelilih Marudi sereta bala komuniti besemak ti udah mantu opis-opis bekaul, bejalaika operasyen nyentuk orang ke tesat ditemu enggau likun.
“Tu pelasar pemadu manah endur kitai ngayan ngagai menua luar, alai komuniti Malaysia iya nya komuniti ti siru sereta seruran ngemeranka pemanah ulah enggau pengawa kitai tu mujur narit penyiru sida lalu nerima puji ari menua luar,” pia ku Ketuai Polis Pelilih (KPD) Baram, DSP Gabriel Risut ngelansa pasal pekara nya.
Iya mansutka pekara tu rambau bejadika pengerami meri basa enggau ‘Jasamu Dikenang’ ke diatur Indu Opis Pelilih (IPD) Marudi bepalan ba Opis Polis Marudi ditu malam kemari.
Berindik enggau nya, Gabriel mega bisi nyuaka tepa basa iya enggau raban polis ngagai komuniti di Marudi ke seruran meri kerejasama enggau sukung rat nadai ngira jam nyengkaum pengawa nyidi enggau nyelamat (ba Taman Negara Gunung Mulu) ti dimun kena 20 Oktober nyentukka peranak Australia ke tesat nya ditemu enggau likun kena 1 November tu tadi.
“Bala komuniti ke bisi mantu sida iya nya ari raban bansa Penan ari Long Iman, Batu Bungan enggau Kampung Mulu sereta sekeda raban bansa Bidayuh ari Kampung Bengoh, Pendawan, Kuching ke datai volunteer mantu operasyen nya.
“Pemujur ke bansa tu patut dibantai sereta dikemeran entara bala komuniti enggau polis sereta ejensi perintah ke bukai,” tandu iya.
Berebak enggau nya, KPD Marudi mega muji pengawa dipejalaika bala pemesai enggau staf IPD Marudi, lalu ku iya, taja Pelilih Marudi ke pemadu besai di Sarawak sereta betapi enggau pemar ari sukut penyauh enggau gaya kar menua ti mar, tang pengawa nagang pesalah ngaul mayuh bengkah pampang, mujur nurunka indeks pesalah di Baram.
Ku iya, dalam timpuh ari 1 Januari ngagai November taun tu tadi, sepenyampau 93 iti kes diripot lalu dalam timpuh ke sama taun tu mega, sepenyampau 66 iti kes diripot alai penyampau kes nurun manggai 29 iti.
Ba lansa bekaul, Gabriel mega nangkan mensia mayuh ke nerima kangau telefon ari orang ti enda dikelala, minta sida nyimpan wang ke dalam akaun bank alai sida dipadah udah menang ba sekeda program tauka deka ngatur pengerami ba kedai- kedai makai, ngambi anang ibuhka kangau nya.
Ku iya, sida ke nerima kangau telefon bansa tu patut ngelawa opis polis besemak ngaga ripot polis dikena nyeliahka diri ari kena tipu.
Beserimbai enggau program nya, Gabriel mega bisi nyuaka setipikit basa ari Ketuai Polis Menua ngagai Tim BARAM 4 dalam aum KIK PDRM 2016, piak media enggau mensia mayuh.
Iya mega nyuaka setipikit meri basa ngagai Sub- Inspektor Ramli Salleh ti mindah gawa ngagai IPD Limbang, Rohaiza ( IPD Saratok), Eleanor Kobit (IPD Pendawan).