Giga chara nyeliah pemati ketegal charutka tanah NCR
Nya berindik ari sekeda kes ti nyadi dalam kandang beberapa bulan ke udah dalam taun tu
KUCHING: Baru Bian ( PKR - Ba’Kelalan) minta perintah diatu patut ngiga chara dikena ngenukuka nadai agi kes pemati nyadi ketegal charutka tanah adat bansa asal (NCR).
Iya madah, dalam kandang beberapa bulan ke udah bisi kes pemati ketegal tanah NCR baka kes Bill Kayong enggau bulan nyin kemari di Balingian, bisi kes pemati ketegal charutka tanah NCR lebuh seraban samseng datai ngagai genturung pendiau lalu ngaga penyarut.
“Perintah diatu patut ngena chara ti engkeman agi kena nentuka nadai agi kes pemati ketegal charutka tanah NCR.
“Aku minta perintah bebasaka pemutus Kort ke alai tanah pemakai menua enggau pulau galau sebagi ari tanah NCR lalu merambu sekali agi Atur Tanah Sarawak patut diubah.
“Perintah mega patut mansik baru polisi enggau pengawa ngeluarka lisin nebang kayu enggau Suwa Sementara bekaul tanah NCR,” ku iya.
Baru ke mega Presiden PKR mansutka pekara nya lebuh ti bejuraika ba bacha kedua kali Rang Undang-Undang Per- bekalan (2017), 2016 enggau mosyen bekaul Resolusyen Anggar Pemansang Ungkup Belanja 2017, ba aum Kedua Penggal Keterubah, Kunsil Nengeri Ke-18 hari ketiga, ke diatur ba Begunan Kunsil Nengeri ditu, kemari.
“Aku sekali agi minta ‘Land Rights Commission’ ditumbuhka tauka Tribunal Tanah baka ti diperambu Ketuai Akim Sabah enggau Sarawak, Tan Sri Richard Malanjum kena bulan Januari taun tu tadi,” ku iya.
Enggau pengarap ke diberi rayat ku Baru, iya ngarapka Adenan enggau kabinet iya ulih meda pematut enggau peluang ngagai pengempu tanah ti nuntut lalu mutarka isu tanah ke besererak tuntut.
Nambahka Baru mega madahka diri nyambut manah penemu perintah ti ngantung lisin kompeni ke muka ke- bun bedandang besai ngena samseng bekaul enggau tanah NCR.
“Tu perambu tauka penemu ti chukup manah lalu aku ngarapka tu ulih dipejalaika enggau lengkas,” ku iya seraya betanya nama atur tauka ukum ke ditinggang ngagai orang ke bisi kaul enggau penyalah munuh Bill Kayong, dalam kandang beberapa bulan ke udah.
Kelimpah ari nya, Baru mega muji Kepala Menteri ti numbuhka Unit Ukai Jalai Pengarap Islam dalam bulan Jun tu tadi ti nyendiaka pelasar endur berandauka isu enggau jalai pengarap.
“Tang ngirauka laban nyentuk ke sehari tu, nadai udah nemu sebarang penerang ari pemesai tauka unit ke bekaul. Aku ngarapka menteri ti megai tanggungpengawa ba unit nya ulih madahka pemansang unit nya,” ku iya.
Aku minta perintah bebasaka pemutus Kort ke alai tanah pemakai menua enggau pulau galau sebagi ari tanah NCR lalu merambu sekali agi Atur Tanah Sarawak patut diubah. Baru Bian Kaban Kunsil Nengeri Ba’Kelalan