UPP deka numbuhka Biro Servis Komuniti

KUCHING: United People’s Party (UPP) deka numbuhka 40 unit Biro Servis Komuniti UPP ti keterubah ungkup zon selatan (Kuching).

Presiden UPP, Dato Sri Wong Soon Koh madah biro tu deka dibagi ngagai sekeda komiti tetap baka Komiti Tetap Bumiputera enggau Komiti Nembiak ti deka ngemeratka utai ti deka dikena nyengkaum penanggul nembiak enggau Bumiputera di nengeri tu.

“Biro tu ditumbuh lalu deka nyadi pelasar ngagai UPP ngena semua pemisi ari semua pampang parti seraya numbuhka siti tim ti nyendiaka mayuh bengkah servis ke komuniti,” ku iya.

Tetiap sitak ku iya deka milih empat tauka lima iku pengari gawa ke biro nya meri servis b aka pengelantang pendiau, pemansang enggau utai ti diguna bukai ba tetiap sitak, ku iya.

Kena 27 November 2016 ba pengerami nyiri kaban biro ti diatur ba KTS Garden, penerang silik bekaul enggau pengawa numbuhka biro nya deka dipadah.

“Enti nitih, biro tu udah belabuh ngereja pengawa, sida udah ngagai sekula SMK St Teresa (pengudah dewan sekula nya angus) lalu bisi meri 10 set komputer ke dikena opis sekula nya, kelimpah ari nyendiaka servis ngagai komuniti di sitak selatan,” ku Wong madah dalam aum media ba Aum Kunsil Nengeri (DUN) ditu, kemari.

“Kami ngarapka ti dichiri ila ulih bejalaika pengawa sereta seruran bisi maya deka diguna rayat,” ku iya.

Ngenang pasal Komuniti Tetap Bumiputera, iya ma dahka nya uudah ditumbuh ba tiga sitak baka Mambong, Opar enggau Engkilili ti deka bejalaika pengawa pengudah pengawa nyiri ila.

Kami mega merambu deka numbuhka biro servis komuniti ba pelilih tengah baka di Sibu enggau pelilih utara (Miri) ba awak ke semak tu,” ku iya.

Sama bisi ngulu aum media nya kemari, Sapit Presiden UPP Datuk Dr Jerip Susil, kededua Mandal presiden kanan UPP Ranum Mina enggau Datuk Tiong Thai King sereta Ketuai Nembiak UPP Dr Johichal Rayong Nyipa.