PTR Meradong nyukung perambu ngubah 26 seksyen dalam Adat Iban
Ngambika adat ke dikena seriris enggau ubah pemansang dunya diatu
SIBU: Perambu deka ngubah 26 iti seksyen dalam Adat Iban 1993 ngambika setipak enggau jalai pengidup kemaya hari tu nerima timbal ti manah ari bala tuai rumah pelilih Meradong, Bintangor.
Chairman Gerempung Tuai Rumah ( PTR) Pampang Meradong Tuai Rumah (TR) Rantie Ayai madah, perambu nya ngena digaga beduduk ari beberapa bengkah adat Iban bisi enda engkeman agi dikena.
Ambika banding ku iya, baka adat ngatur orang sarak, tunggu mata duit ke diletak enda engkeman agi.
“Perambu tu ukai reti melakangka adat kitai ari kelia tang perambu baka tu patut diubah baru seririh enggau gaya pengidup maya hari tu.
“Enti baka adat sarak, tunggu ke diletak bangat mimit kelimpah laki tauka bini lalu ngelengka anak sida pia aja.
“Iya ke merinsa iya nya anak sida anang agi nyema bini ke disarak nya nadai kereja kena nupi bala anak ti nadai apai agi,” pia ku iya madah ngagai pengarang berita, kemari.
Perambu tu ukai reti melakangka adat kitai ari kelia tang perambu baka tu patut diubah baru seriris enggau gaya pengidup maya hari tu. TR Rantie Ayai Chairman PTR Meradong
Iya mantaika penemu tu maya dipinta ngelansa penerang ke dibantai Menteri Muda ba Opis Kepala Menteri ( Undang- Undang enggau Adat Bumiputera) Datuk John Sikie Tayai ba Aum Kedua Penggal Keterubah, Aum Kunsil Nengeri (DUN) Ke-18 ke diatur ba Begunan DUN di Kuching, kilah ensana.
Agi nyebut Adat Sarak, ku Rantie, ubah ba adat nya nyangka tau dikena ngurangka agi kes sarak lebih agi sida ke biak jadi melaki bini.
“Nyema adat tu diserenih baru baka ngeletakka ukum ti balat agi ngagai sapa ke dulu muai pangan diri, penyampau kes sarak nyangka mimit agi nyadi.
“Ukum ti kelalu lempung baka ti ngemuntang tauka sepeneka ati muai laki tauka bini kelimpah enda ngira pengidup dudi hari bala anak,” ku iya madah baru.
Ukai semina ba Adat Sarak, ku Rantie, mayuh agi adat Iban ke bukai patut diubah tauka dibuai sekali.
Ku iya, pansik, aum, randau patut diatur antara tuai raban bansa dikena nyerenih baru adat Iban.
Sebaka enggau penemu iya, TR Ngipa Andieng madah, perambu ngubah tauka madam sekeda adat Iban patut belabuh diatur diatu laban ukai semina ngira enda engkeman dikena agi tang patut dikira ari sukut pemansang raban bansa Iban.
Iya madah, ba dini-dini endur ba dunya tu, enti adat enda ulih dikena agi ketegal pengidup ti udah berubah, adat nya tau dipansik baru.
“Ngubah adat tu ukai reti kitai sepeneka ngatur tang kitai meseti ngira pengelantang pengidup bansa kitai empu.
“Ngarapka perambu tu ulih dipenyadi ngambika pengidup bansa Iban ulih nitihka pengidup bansa bukai maya dunya mansang diatu,” pia ku iya.
Bekunsi peneleba ngatur orang sarak, Tr Ngipa madahka iya nyentuk ke sehari tu udah ngatur dua iti kes sarak bepun ari laya tauka ditemu butang ngena telefon.
Iya madahka diri bepenanggul ngeletak ukum laban ukum ke diletak ba adat ke diatu enda engkeman agi nundaka ubah ulah orang diatu ti bekenaka chara baru iya nya bekenaka laman rama baka ‘Facebook’ ngayahka pangan diri.
“Semua tu mandangka adat kitai Iban patut diserenih sereta diseleti baru,” ku iya madah.