Komuniti Penan serunyut maju nitihka langgur program pemansang perintah
KUCHING: Komuniti Penan diatu udah belabuh ngereja pengawa betanam betupi ti dipejalaika nengah program ari perintah ti dikena ngemansutka sida ari penyeranta.
Sapit Kepala Menteri Datuk Amar Douglas Uggah Embas madah, sebengkah ari program ke digaga ungkup komuniti Penan iya nya ngemansangka Stesyen Betanam Betupi Tanah Tinggi Baram (IBHAS), ti ditumbuhka ba tanah ti mungkur pemesai 614 ekar nyengkaum ngaga komplek ba endur nya.
“Diatu bisi 10 hektar ke benung diuji dulu endur betanam. Utai ke dipeda kita sehari tu iya nya produk ke signifikan lalu tu mandangka raban bansa Penan ti idup enda mendam ba sesiti endur ngelama tu, diatu udah ulih nitihka komuniti bukai ngereja pengawa betanam betupi,” ku Uggah.
Entara utai mujur ditanam komuniti Penan baka sayur Hong Kong Cai Xin, Pak choy warrior -702 enggau Pak Choy Fairlady (Sawi Susu).
“Tu singkang positif nitihka program perintah munaska penyeranta,” ku iya.
Uggah ti mega Menteri Betanam Betupi Moden enggau Ekonomi Menua Pesisir madah, penyampau komuniti Penan bisi 13,000 iku lalu penyampau ruang bilik bisi 2,273 buah ari 84 buah genturung pendiau di Ulu Baram. Tebal agi sida tu seranta.
Ku iya baru, perintah ngembuan juluk deka mai ubah lalu ngemasukka kandang menua Ulu Baram dalam Program Pemansang Modal Mensia, laban komuniti ti mit di menua nya kelebih agi bansa Penan bepanggai ba pemakai ti diulih ari kampung baka ari pengawa ngasu enggau berikan.
“Program Pemansang Modal Mensia ti dipejalaika Opis Betanam Betupi udah ngubah gaya pengidup komuniti Penan ti bepanggai ba pemakai ari kampung ngagai pengawa betanam betupi.
“Pengawa betanam betupi ukai semina ulih ngemansutka pemakai tang mega nyendiaka penatai pemisi kelebih dikena ngemansutka sida ari sarang penyeranta,” ku iya.
“Enti diperati bajet ke dibantai Kepala Menteri, bajet nya ngemeratka pengawa ngemunaska penyeranta sereta nambah ungkup belanja dikena ngemansangka menua pesisir.
“Kitai gagit endar manggai ba taun 2018 ulih ngurangka penyampau rayat ke seranta ngagai tikas ke pemadu baruh. Nya kebuah kitai enda tau enda bejalaika program transformesyen nyengkaum nyendiaka palan endur ngumpul asil, ngambika mensia mayuh ke diau di menua pesisir ulih nyual produk sida,” ku iya.
Kelimpah ari nya, ex-sapit Menteri Betanam Betupi enggau Ekonomi Menua Pesisir Datuk Patinggi Tan Sri Alfred Jabu madah, dalam berapa taun tu ke udah perintah endang ngemeratka pengawa ngemansangka menua pesisir.
“Diatu orang Penan udah nemu pegelantang pengidup sida jemah ila bepanggai ba perintah enggau program ari pemansang ari perintah.
“Komuniti Penan diajar chara ngaga ngaga asil pengelandik jari, ngaga pemakai enggau betanam…Perintah mega meri 10 ekar tanah ke tetiap ruang bilik ngambika bisi endur sida bekebun getah,” ku iya.
Sama bisi ba aum media nya kemari, Menteri Muda Betanam Betupi Malcolm Mussen Lamoh, Menteri Muda Pengawa Betanam Betupi (Ekonomi Ulu Sungai enggau Kebun Bedandang Besai) Datuk Francis Harden Hollis, Menteri Pengawa Betanam Betupi ( Ekonomi Menua Pesisir (Menua Pesisir enggau Pengawa Berikan) Datuk Julaihi Narawi enggau Pemesai Eksekutif RECODA, Datu Wilson Baya Dandot.