Wang Turu Pelajar DUN Pelagus deka ditumbuh
KAPIT: Kaban Kunsil Nengeri (ADUN) Pelagus Wilson Nyabong Ijang madahka bisi perambu deka numbuhka Wang Turu Pelajar sitak Pelagus ungkup nembiak ari baruh pegai sitak nya.
Wilson bejaku munyi tu lebuh ti bejadika Pengerami Makai Lemai Gerempung Apai Indai enggau Pengajar (PIBG) Sekula Primari (SK) Lepong Baleh 2016 bedau lama.
Beserimbai enggau tu, iya bisi madahka pengandal ati diri ngagai sekeda Gerempung Ukai Dikuasa Perintah (NGO) ke udah naka ulih nyaup nembiak sekula kelebih agi sida ke diau di kandang menua pesisir.
“Aku meda mayuh Gerempung Ukai Dikuasa Perintah (NGO) baka SDNU enggau SIDS ninting taun sida udah bisi meri insentif ngagai nembiak ke mujur bulih pemutus peresa ti nyulut, lalu tu ulih meransang sida iya ngambika belajar enggau bebendar agi.
“Udah nyadi seiti tanggung pengawa aku ngemeranka pelajar sekula laban kitai sama nemu pelajar tu iya nya kunchi dikena ngagai jalai pengidup ke manah,” ku iya.
Berindik ari penyiru nya, Wilson udah pansut enggau buah runding deka numbuhka Tabung Pelajar ungkup sitak dipegai iya, ngambika tikas pelajar nembiak menua pesisir kelebih agi di sitak Pelagus mantaika pemutus ti manah.
“Aku mega deka ke kualiti enggau kuantiti ti manah ba pelajar. Nya alai, aku numbuhka Tabung Pelajar N61 Pelagus lalu ungkup taun tu aku udah ngeletak RM100,000 setaun, sereta bagi ngagai lima penggal tu ila iya nya sepenyampau RM500,000 diungkup aku kena tabung pelajar tu.
“Tiap iku sida ke ulih nampung pelajar ngagai tikas ke tinggi agi (Universiti) ke ngambi degree deka diberi RM1000 sereta sida ke ngambi diploma deka diberi RM500 seiku,” ku iya nambah.
Ba kenang ke bukai, iya ngelalau bala PIBG sekula tu ngambi sama begerempung enggau iya ngangkatka tikas pemanah pelajar nembiak sekula kelebih agi ba sitak iya. Lalu, ku iya, bala PIBG mega ulih minta ari Tabung Pelajar tu dikena ngatur program baka randau peransang ngagai nembiak sereta program bukai ke ulih pulaika pemaik ungkup nembiak sekula.
“Sepenyampau dua belas buah sekula primari ke bisi ba sitak Pelagus tu. Aku ngarapka bala pengajar ulih meri komitmen lebuh ke ngajar bala nembiak,” ku iya nyemetak.
Nyabong mega udah meri RM45,000 ngagai SK Lepong Baleh dikena nganti atap ari blok kelas ngagai Dewan Mayuh Guna lalu iya ti ngarika Sapit Menteri Pemansang Menua Pesisir enggau Kandang Menua, Datuk Alexander Nanta Linggi meri RM10,000.
Sama bisi datai, Sekretari Politik ngagai Kepala Menteri Sarawak, Nicholas Kudi Jantai, Sapit Pemesai Opis Pelajar, Sham Rawi, Pemesai Opis Nembiak enggau Lumba, Jack Janda sereta ke bukai.