Makit baru endur bejual asil betanam betupi, kampung deka digaga di Kapit
KUCHING: Opis Kunsil Pelilih Menua Kapit benung ngiga palan ti engkeman endur ngaga sebuah makit baru dikena nangkup pemayuh orang ti bejualka asil betanam betupi enggau asil kampung ba kandang menua nya ti majak nambah.
Menteri Muda Kunsil Kandang Menua, Datu Dr. Penguang Manggil madah, diau piak ke bekaul benung ngiga tanah ke bisi begunan ti kala endur tauka dikena Opis Betanam Betupi.
“Opis kunsil kandang menua benung ngiga engka dipelabaka tau bulih tanah ke bisi sebuah begunan puang ke sebedau tu kala endur Opis Betanam Betupi ba Pasar Baru Kapit, awakka bisi endur bejual asil kampung,” ku iya.
Penguang mansutka pekara nya lebuh nyaut tanya ari Jefferson Jamit Unyat (BNBukit Goram) maya sesi tanya saut ba aum kunsil nengeri ke diatur ba Begunan Kunsil Nengeri ditu, ensanus.
Jefferson ba tanya iya nanyaka status perambu ngaga Makit asil betanam betupi di Kapit ti udah kelalu sekut sereta enda tetangkupka pemayuh orang dagang ti majak nambah.
Nambahka nya Penguang madah, dikena meri pengelantang ngagai orang dagang tauka orang ke bejualka asil sida, perintah deka ngemansangka projek ari baruh Langgur Malaysia Lumpar Ke-11 (RMK-11).
Iya madahka perintah udah ngungkupka belanja dikena bejalaika projek nya lalu nyendiaka lot ungkup orang dagang ke bejualka asil kampung.
“Kelimpah ari nya, pemansang ke diperambu ba projek Tebing Ai Kapit dari baruh RMK-11 ti deka ngemesaika palan bedagang ungkup orang dagang ke bejual ujung minggu.
“Penyampau belanja ke udah dikemendarka dikena ngemanjuka projek Tebing Ai Kapit ari baruh RMK-11 iya nya RM5 juta lalu penyampau lot ke disediaka ngagai orang dagang ti bejual maya ujung minggu bisi 100 iti lot,” ku iya lebuh nyaut tanya tambah ari Jefferson.