Raban K1M dipinta beserakup ungkup pemaik semua
Program tu ngempung semua komuniti ngereja pengawa begulai nitihka konsep 1Malaysia
SARIKEI: Pemesai Pemadah Bagi Menua Sarikei, Mohd Sahrizan Putit meransang Komuniti 1Malaysia ( K1M) terus besaup dalam semua pekara ti tau pulaika pemaik ngagai semua, kelebih agi bekaul enggau agenda ti dipejalaika perintah.
Ku iya, K1M ditumbuh kena nyemaka progam transformasyen ti dipejalaika Opis Pemadah nerenak penaluk beserakup entara pupu bansa ungkup konsep 1Malaysia.
“Dikena ngemujurka ju- luk tu, K1M patut chakah agi ngambika genap pekara ti ditapi bala komuniti enggau polisi dipejalaika perintah ulih dikereja ba tikas pemadu manah meri pemaik ngagai semua piak. Berebak enggau nya, nengah program K1M tu nyadi pelasar ngagai bala komuniti enggau mega opis perintah ngedutka kaul sida ngambika genap polisi dipejalaika perintah ulih dijapai enggau mujur,” ku Sharizan rambau Program Info K1M Kambung Seberang Sarikei, kemari.
Program Info K1M tu udah diatur ba sebuah hotel besemak ditu lalu iya diatur ari kerejasama entara K1M Kpg Seberang Sarikei eng- gau Opis Pemadah Pelilih Sarikei.
Nitih ku iya, genap K1M patut ngelangkar sereta bejalaika aktiviti ti ulih mai pangka ke manah ungkup komuniti kelebih agi ungkup menua tu.
Tampung Sharizan, kaban K1M nyadi ejen ubah sereta mai bala komuniti nyingkang mansang seriris enggau arus pemansang.
“Penyerakup ngasuh menua nyapai pemansang ke jampat lalu rayat idup dalam pengelikun enggau pengelantang.
“Anang ngemesaika pekara ke tau ngemai bansa pambar, laban tu ulih mai empas ke enda manah ngagai menua.
“Nya alai, serakup enggau pangan diri patut dijaga enggau manah. Genap penanggul ke nyadi patut diputar enggau memanah,” tandu iya.
Sama bisi datai ngulu program Pemesai Pemadah Bagi Menua Sarikei, Abdul Latip Shamsuddin, Chairman K1M Kpg Seberang Sarikei, Bidin Bong, Penghulu Awang Ahmad Dawi sereta bala kaban ari enam buah K1M ari pelilih Sarikei.
Dikena ngemujurka juluk tu, K1M patut chakah agi ngambika genap pekara ti ditapi komuniti enggau polisi dipejalaika perintah ulih dikereja ba tikas pemadu manah meri pemaik ngagai semua piak. Berebak enggau nya, nengah program K1M tu nyadi pelasar ngagai bala komuniti enggau mega opis perintah ngedutka kaul sida ngambika genap polisi dipejalaika perintah ulih dijapai enggau mujur. Mohd Sahrizan Putit Pemesai Pemadah Bagi Menua Sarikei