Sg Seblak, Btg Krian dipelaba nyadi palan ngasu baya
KUCHING: Sungai Seblak enggau Batang Krian dipelaba deka nyadi palan ngasu baya di nengeri tu, berindik ari tikas kategori baya ti diturun ari Apendiks I ngagai Apendiks II ngujungka baya di Sarawak tau diasu sereta didagang.
Menteri Muda Rama Menua Datu Len Talif Salleh madah tu berindik ari kededua sungai nya ngembuan bacha penyampau baya ke mayuh pia mega lalu mutarka penanggul entara jelu siga nya enggau mensia.
“Bepelasarka survei pemadu baru ti udah dipejalai, pemayuh baya ba Sungai Seblak iya nya 1.84 individu tetiap satu kilometer lalu 1.6 individu tetiap satu kilometer ba Batang Krian manding enggau 1.1 individu tetiap satu kilometer ba serata Sarawak.
“Pemayuh populasi baya ngelui ari seiku individu tetiap satu kilometer tu ngujungka Sungai Seblak enggau Batang Krian digaga nyadi palan bisi penau ngasu baya,” ku iya rambau Aum Kunsil Nengeri (DUN) ditu kemari.
Taja pia, Len Talif madah pengawa ngasu baya ba kededua sungai tu bepanggai ba penyampau diletak dalam skop Apendiks II.
Pia mega ku iya, pengawa ngasu baya kelebih agi ke ngeruga pengelikun nyawa semina ulih dipejalai enggau ngulihka pemendar ari kontroler jelu siga.
Tambah mega, pengawa ngeluarka lisin mega deka diberi pemerat ngagai peranak menua nya dikena sida ngasu baya siga.
Taja pia ku iya, naka ke diatu tebal agi operasyen ngasu baya dipejalaika unit SWAT, Opis Kampung Sarawak ( FC) enggau bantu ejensi perintah ke bukai sereta peranak ke diau besemak.
Dulu agi ari nya, Len Talif berkata bisi tujuh operasyen nangkap baya udah dipejalaika unit SWAT, SFC ba Sungai Seblak enggau Batang Krian alai 16 iku baya udah mujur ditangkap ari kededua sungai tu.
“Operasyen ngasu baya deka terus dipejalai,” ku iya.
Bisi dua bansa baya di Sarawak iya nya baya ngekatak ( baya ai masin) enggau baya kenyulong ( baya ai paya).
Dalam taun 1979, kededua bansa baya tu udah dilis nyadi jelu dijaga terit ketegal populasyen deka punas rambau nya.
Perintah mega udah ngeletak semilan atur proaktif dikena nyaga baya ba Sarawak ari perintah kabinet kena 20 September 2012.