KM ngemendar RM2.5 juta dikena mutarka penanggul tanah tusur ba Rumah Mering

KUCHING: Kepala Menteri Tan Sri Adenan Satem udah ngemendarka belanja RM2.5 juta ungkup pengawa ngemanah enggau meresa tanah tusur di belakang Rumah Panjai Mering Madang di Sebauh, Bintulu.

Kaban Kunsil Nengeri (ADUN) Murum Chukpai Kennedy Ugon madah ngagai The Borneo Post iya enggau peranak Kayan ba rumah panjai nya meri terimah kasih ngagai Adenan ke ukai semina mendingka peminta sida tang mutarka penanggul sida.

“RM2.5 juta udah diungkup ari baruh Projek Transformasyen Menua Pesisir (RTP) lalu iya datai ari wang turu nengeri. Kami chukup beterima kasih ngagai iya. Iya endang seiku kepala menteri ti mendingka peminta rayat iya,” ku Chukpai.

Chukpai madah Opis Kereja Raya (JKR) nengeri deka megai projek ti deka berengkah bejalaika projek ngemanah dalam taun baru.

“Aku ngarapka projek tu ulih berengkah taun tu laban enda ulih nganti agi. Musim landas deka datai. Lalu penyampau ai ujan betambah mayuh maya musim musim landas, aku irau nya tau ngasuh tanah tusur balat agi nyadi,” ku Chukpai nyemetak.

Tanah tusur di belakang rumah panjai Mering Madang di Tubau, Sebauh nyadi penanggul besai ngagai peranak rumah panjai. Maya ujan bangat,sida enda ulih nindukka diri.

Sida mindah nindukka diri ba bilik besai seraya bejejaga mending sekalika bisi munyi ‘ tek- tek’ datai ari baruh. Nyema bisi, reti nya mayuh datai ari belakang rumah sida tusur ngagai lebak.

Tanah tusur di belakang rumah nya balat endar nyadi ngujungka rumah panjai sida diatu urung 90 darjah tebiang. Pekara ke ngasuh irau agi, peranak rumah panjai benung ngaga rumah sida sebagi ari dapur alai tanah udah tusur.

Tim The Borneo Post Adventure (BAT) 2016 udah ngabas rumah panjai ba tanah bukit kena 26 Jun sereta mantaika pekara nya.

Sapit tuai rumah Mering Madang Mering Lasah, 54 taun, enda ulih ngelalaika penusah sereta pengirau diri lebuh dikerandau raban BAT 2016.

Iya udah ngeluarka belanja RM40,000 dikena ngaga rumah nya, lalu nyema rumah panjai ditaban tanah tusur, iya deka nanggung pengerugi.

Komuniti rumah panjai Kayan berengkah ngentak rumah panjai sida ditu 10 taun ke udah tang semina pindah kia tujuh taun ke udah. Taja pia, kenyau ari dua taun ke udah, tanah berengkah tusur lalu sekeda belakang rumah sida nyadi tebiang. Kenyau ari nya, tanah tusur nyadi berenggat nyentuk ke diatu.

Nya alai, Chukpai ngelalau peranak rumah panjai ba sitak menua dipegai iya anang ngentak rumah panjai ba tanah bebukit.

MINTA DIPUTAR LENGKAS: Tanah tusur udah nabanka sebagi ari belakang rumah Rumah Panjai Mering Madang, Tubau, Sebauh. Chukpai (tiga kanan) enggau Pemesai Pelilih Sebauh Desmond Jerukan (dua kanan) sereta bala ketuai komuniti Tubau mai raban BAT 2016...

NGIRAUKA ATI: Tengah belakang rumah Rumah Panjai Mering Madang ke udah tebiang berindik ari tanah tusur.