RUU355: Pemutus digaga pengudah dipansik silik
MP Sarawak dipinta ngenanka dulu pemutus nyentuk komiti ti ditumbuh tembu bejalaika pansik
Kitai gaga ati laban pekara tu dibai ngagai sebengkah komiti ke deka mansik silik pekara tu ti diarika semua parti. Udah nya baru kitai ulih meri pemutus ti tetap sekalika nyukung tauka enda. Datuk Patinggi Tan Sri Adenan Satem Kepala Menteri Sarawak
KUCHING: Kepala Menteri Datuk Patinggi Tan Sri Adenan Satem minta Kaban Parlimen Barisan Nasional (BN) ari Sarawak ngambika ngetanka dulu sebarang pemutus bekaul enggau Rang Undang- Undang Kediri Datuk Seri Abdul Hadi Awang ke minta Akta Kort Syariah ( Bidang Kuasa Jenayah) 1965 (RUU355) diubah.
Iya minta Kaban Parlimen ari Sarawak ngaga pemutus pengudah sebengkah komiti ke ditumbuh mansik silik pekara nya.
Sarawak bisi 31 iku Kaban Parlimen nyengkaum enam ke bepengarap Islam enggau ke bukai nya ukai bepengarap Islam.
“Laban sehari tu (kemari) nadai pengawa ngundi tauka bejuraika (pasal RUU355), semua Kaban Parlimen Sarawak enda ngaga sebarang pemutus. Kitai ngelakka dulu pekara tu.
“Kitai gaga ati laban pekara tu dibai ngagai sebengkah komiti ke deka mansik silik pekara tu ti diarika semua parti. Udah nya baru kitai ulih meri pemutus ti tetap sekalika nyukung tauka enda,” ku iya.
Adenan mansutka pekara nya dalam aum pengarang berita, pengudah nerima penemuai basa ari Sapit Menteri Besai Datuk Seri Ahmad Zahid Hamidi, ke diatur ba opis iya di Begunan Kunsil Nengeri (DUN) ditu, kemari.
Sebedau tu Adenan minta semua Kaban Parlimen ari Sarawak ngambika enda nyukung Rang Undang-Undang Kediri Datuk Seri Abdul Hadi Awang ti minta Akta Kort Syariah (Bidang Kuasa Jenayah) 1965 ( RUU355) diubah.
Dalam aum pengarang berita kemari, ditanya baru sekalika iya tetap minta Kaban Parlimen BN ari Sarawak ngundi enda nyukung rang undang-undang nya, iya madahka pekara nya deka diperundingka baru pengudah ninga penerang ari Sapit Menteri Besai (TPM).
“Sebedau tu udah kala ngaga penerang tauka pemutus ti nyata tang pengudah mendingka penerang ari TPM, sida (kaban parlimen BN ari Sarawak) patut berundingka pekara nya baru, bekaul eng- gau pemutus sebedau tu,” ku iya.
Kelimpah ari nya lebuh ditanya nyema pekara RUUU355 nya bekaul enggau ‘Hudud’, Adenan netapka pemutus nadai Hudud di Sarawak.
“TPM udah nerang tadi, tu nadai bekaul enggau Hudud,” ku iya dalam aum pengarang berita ke disempulang Zahid.
Sama bisi dalam aum pengarang berita nya kemari, Menteri Pengatur Pengeraja Asal enggau Rampa Menua II, Datuk Amar Awang tengah Ali Hasan; Menteri Kunsil Kandang Menua Datuk Prof. Dr Sim Kui Hian; Menteri Perengka Guna Mensia Mayuh Dato Sri Dr. Stepehen Rundi Utom enggau ke bukai.