Tambahka penyampau ketuai raban bansa, tuai rumah dibaruh dikuasa MPP
KUCHING: Lebih mayuh ketuai raban bansa sereta tuai rumah patut dichiri dalam kandang endur ke dikuasa Majlis Perbandaran Padawan (MPP), beduduk ari penyampau mensia dalam kandang menua nya ti majak nambah.
Chairman MPP, Lo Khere Chiang madahka diri nyukung peminta Gerempung Ketuai Raban Bansa enggau Tuai Tumah Bansa Iban Bagi Menua Kuching (PEMAIK) bekaul perambu tauka pekara nya.
“Aku nyukung penemu PEMAIK ti minta ditambah penyampau ketuai raban bansa enggau tuai rumah dalam kandang endur ke dikuasa MPP iya nya ditambah seiku pemancha, tiga iku penghulu enggau 13 iku tuai rumah.
“Ba aku, aku endang nyukung penemu tauka langgur tu laban diatu penyampau mensia dalam kandang menua ke dikuasa MPP majak nambah. Aku ngasaika tu nadai penanggul,” ku iya seraya minta Pemanca John Tambi ke nyadi chairman PEMAIK meri nama ke patut.
Lo mansutka pekara nya lebuh bejaku ba pengerami Serumpu Makai Nyerumba Nyuaka Setipikit Komiti Pemansang enggau Pengelikun Genturung Pendiau (JKKK) Bansa Iban Pelilih Menua Kuching ke diatur PEMAIK ba sebuah hotel ditu, malam ensanus.
Berebak enggau tu Kaban Kunsil Nengeri ( ADUN) Batu Kitang nya minta dalam JKKK terus begempung ngambika ulih mutarka pen- anggul nyengkaum ba atur pengawa milih sapa ke nyadi ketuai.
“Tetiap JKKK, gerempung Ukai Dikuasa Perintah ( NGO) tauka dalam parti politik enda tau enda bisi penanggul lalu nya patut diputarka begulai.
“Baka pengawa milih nyadi ketuai dalam JKKK, ketuai tauka tuai rumah ke dipilih nya enda tau enda ke dipilih tauka dikerinduka semua rayat dalam kandang endur nya dikena nyeliahka ari sebarang penanggul.
“JKKK tu beguna amat laban ngenataika polisi pemansang perintah ngagai rayat,” ku iya.
Ba pengerami nya Lo ngungkupka RM2,000 ngagai PEMAIK, dikena meransang gerempung nya bejalaika aktiviti.
Dulu ari nya dalam jaku pengelalu Pemanca John minta sereta merambu ngagai perintah nambahka penyampau ketuai raban bansa enggau tuai rumah bansa Iban di Pelilih Kuching beduduk ari penyampau bansa Iban ti majak nambah di Kuching.
“Kami (PEMAIK) merambu ngagai Lo sereta Residen Kuching ngambi nambahka ketuai raban bansa enggau tuai rumah dalam pelilih Kuching baka dalam MPP, patut bisi dichiri seiku pemancha sereta patut ditambah tiga iku agi penghulu (diatu bisi dua iku penghulu) lalu patut ditambah 13 iku agi tuai rumah.
“Dalam kandang endur ke dikuasa Dewan Bandaraya Kuching Utara ( DBKU) patut ditambuh seiku agi pemancha.
“Enggau penyampau ketuai raban bansa sereta tuai rumah nya ulih ngenyakahka agi pengawa meri servis ngagai rayat,” ku iya seraya ngarapka Residen Bagi Menua Kuching, Shukarmin Chasemon ke bisi datai ngagai pengerami nya ulih berundingka perambu tauka peminta nya.
Ba pengerami nya Lo nyuaka setipikit JKKK ngagai 19 buah JKKK di Pelilih Kuching.
Bisi datai ba pengawa nya malam ensanus, Penyanding Penemu PEMAIK, Temenggong Dato James Jimbun Pungga enggau ke bukai.