Ungkus nyambung elekterik, ai enggau ngaga jalai ditanggung ruang bilik ti dipindah
KUCHING: Pengawa nyambung elekterik enggau ai sereta ngaga jalai nuju rumah panjai baru ke dipinta pindah dalam sitak Kunsil Nengeri (DUN) Tamin ketegal meri awak ngagai projek ngaga Jalai Besai Pan Borneo, deka ditanggung ruang bilik nya empu.
Menteri Muda Perengka Guna Mensia Mayuh (Elektrik enggau Telekomunikesyen) Dr Abdul Rahman Junaidi madah, pengawa mayar pampas tanah ti endur ngaga projek ungkup mensia mayuh nyengkaum projek Jalai Besai Pan Borneo endang baka ke udah diungkup nengah Atur Tanah Nengeri (Bab 81).
“Pampas ke dibayar nyengkaum penyampau tanah, penyampau rega rumah, ungkus penekul enggau ungkus pengawa pindah sereta sebarang pemansang ti dikemendarka nyengkaum nyambung bekal ai enggau elekterik di rumah endur sida diau diatu.
“Laban duit pampas udah dibayar magang, pengawa nyambung elekterik, ai sereta ngaga jalai baru ngagai rumah panjai baru nya deka ditanggung sida empu,” ku Dr Abdul Rahman.
Iya madah munyi nya lebuh nyaut tanya ari ADUN Tamin Christopher Gira anak Sambang ti nanya sekalika perintah bisi nyendiaka ungkup belanja dikena nyambung elekterik, ai enggau ngaga jalai nuju nuju rumah panjai baru ke dipinta pindah di DUN Tamin ketegal meri awak ngagai projek ngaga Jalai Besai Pan Borneo, ba Aum Kunsil Nengeri ke-18 ditu kena Hari Tiga tu tadi.
Ba siti tanya ari ADUN Katibas, Datuk Ambrose Blikau ti nanyaka perambu perintah ke deka nambahka penyampau unit rumah ungkus murah enggau jelan iya di Pelilih Song, Datuk Abdul Karim Rahman Hamzah ke mega Menteri Muda Pengawa Berumah madah, HDC bisi perambu deka ngaga lalu nambahka penyampau unit rumah ungkus murah sereta jelan iya rega di pelilih Song, lalu pansik pasal makit nya deka berengkah dipejalaika pun taun 2017.
“Enti sema asil pansik pasal makit nya positif, HDC deka nganjung peminta ngagai Perintah Besai ngambika ulih ngaga unit tambah ungkup taun 2018,” ku Abdul Karim.
Ba sentang tanya ADUN Balai Ringin, Snowdan Lawan ti nanya sekalika perintah naka ke diatu bisi perambu ngemanahka sekula ba sitak DUN Balai Ringin ny engkaum ngaga sekuah agi sekula sekondari (SMK), Menteri Pengelantang Pendiau, Orang Indu enggau Komuniti Datuk Fatimah Abdullah lebuh ti nyaut tanya nya madahka bajet dikena ngaga sekula di Sarawak ukai semina diungkup ngagai sekeda sitak DUN aja.
“Tang semua pengawa ngaga tauka ngemanahka agi sekula primari deka dipansik PPD (Opis Pelajar Pelilih Menua) enggauOpis Pengatur Sekula empu.
“Taja pia, Perintah komited ngaga tauka ngemanahka agi semua sekula ke bisi di Sarawak, lalu tu bepanggai ba belanja ti udah diungkup.
Ba tanya ADUN Dudong, Datuk Tiong Thai King ti nanya Menteri Betanam Betupi Moden enggau Ekonomi Menua Pesisir pasal perambu perintah sentang skim betanam betupi dikena ngemanahka agi kualiti pengelantang pendiau komuniti menua pesisir di Dudong, Menteri Muda Betanam Betupi Moden, Malcol Mussen Lamoh madah aktiviti pengawa betanam betupi besai ke dipejalai di Dudong baka bekebun getah, sawit, lada, buah enggau sayur.
“Dalam RMK ke-10, perintah nengah sekeda ejensi udah bejalaika program betanam betupi di Dudong nyengkaum bekebun getah ti mungkur urung 466 hektar ti dipasuk 199 iku, bekebun sawit ke mungkur urung 209 hektar ke dipasuk 94 iku, bekebun lada ti mungkur urung 21 hektar ke dipasuk 202 iku sereta betanam buah enggau sayur ke mungkur urung 86 hektar ti dipasuk urung 128 iku.
“Program nya deka ditampung dalam RMK ke-11. Orang ti bumai tauka bekebun ke bisi ati deka masuk program tu diperansang minta ari ejensi baka Opis Betanam Betupi (getah, buah sayur), lada, koko enggau nenas.