Ungkus minimum projek ke tau diberi geran diturun ngagai RM500,000

KUCHING: Perintah Sarawak nurunka ikas ungkus minimum projek ke tau diberi geran, ari RM2.5 juta ngagai RM500,000.

Bejaku ba aum pengarang berita di Begunan Dewan Kunsil Nengeri ( DUN) kemari, Menteri Industri, Pemansang Orang Dagang, Dagang enggau Pemeranak Puku Datuk Amar Awang Tengah Ali Hasan madah pekara nya udah disetuju Unit Pembangunan Agenda Bumiputera (TERAJU).

“Menteri Muda Pemansang Orang Dagang Datuk Mohd Naroden Majais udah mujur ngumbuk TERAJU nurunka ikas nya ngagai RM500, 000 pengudah suah ngapil,”ku iya.

Awang Tengah nambah nengah insiatif ke dikumbai ‘ Facilitation Fund’ nya, kompeni tauka orang dagang deka nerima geran ba penyampau 10 - 15 peratus ari penyampau ungkus projek.

Iya ke mega Menteri Pengatur Pengeraja asal enggau Rampa Menua II madah pemutus nya deka meri awak ngagai mayuh agi kompeni Bumiputera ngambi bagi ba projek lalu bulih pemaik ari inisiatif nya.

“Pekara tu setipak enggau juluk perintah ngerembai pengaya di serata nengeri.

“Geran ke diterima kompeni tau dipelanja ba projek ke digaga, tau mega dikena meli perengka tauka injin ke diguna.

“Geran ke diberi TERAJU tu enda ibuh dibayar pulai, seagi ulih mai penatai ekonomi ngagai komuniti ke diau ngelingi,”ku iya.

Facilitation Fund ditumbuh nengah kerejasama TERAJU enggau Public Private Partnership Unit (UKAS), sebengkah ejensi dibaruh Opis Menteri Be- sai.

Naka ke diatu ku Awang Tengah, penyampau RM200 juta udah dikeluar TERAJU ari penyampau RM2 bilion wang turu dikena ngemujur inisiatif di Sarawak.

“Kenyau 2012, TERAJU enggau MIETI Sarawak udah ngemendar RM144 juta ungkup 48 buah kompeni Bumiputera Sarawak nengah ‘private investment’ sepenyampau RM983 juta.

“Private Investment nengah bantu insiatif Facilitation Fund udah nempa 1,700 pengawa puang di serata Sarawak,”ku iya.