Perintah dipinta majakka bantu ngaga ‘Jalai Ladang’

KUCHING: Perintah dikearapka anang ngetu meri bantu ngaga ‘Jalai Ladang’ nuju kebun tauka kebun bedandang besai di nengeri tu.

Dato Sri Huang Tiong Sii (BN - Repok) madah, bantu ngaga Jalai Ladang nya mega patut disediaka ba sitak iya.

“Aku minta perintah enda ngetu meri bantu ngaga Jalai Ladang ke kebun tauka kebun bedandang besai sida (orang bumai bekebun).

“Jalai alun ti nyambung kebun bedandang besai tauka kebun enggau endur bejual ulih mantu ngenukuka asil utai ke ditanam nya ulih dijual enggau jampat.

“Kelimpah mantu nyungkak tikas penatai pemisi enggau pengidup orang bumai bekebun,” ku iya.

Huang mansutka pekara nya lebuh bejuraika Bacha Kedua Kali Rang UndangUndang Perbekalan (2017), 2016 enggau mosyen bekaul enggau Resolusyen Anggar Pemansang Ungkup Belanja 2017, maya baum kunsil nengeri ke diatur di Begunan Kunsil Nengeri, kena Hari Tiga tu tadi.

Bejaku baru iya madah, penambah penatai pemisi raban orang bumai mega ulih mantu ngangkatka pelajar anak orang bumai bekebun dalam bidang pelajar.

Nambahka nya iya minta perintah nyendiaka bekal elekterik enggau ai ngagai orang bumai bekebun, laban nya ulih ngemudahka orang bumai ngambika ngembuan pengidup ti pengelantang.

Kelimpah ari nya Huang mega ngarapka Dewan Sua- rah Sarikei digaga ba palan baru sereta besai agi dikena nampung penyampau tubuh mensia dalam kandang menua nya ke majak nambah.

Nitih ku iya, maya bisi pengerami dewan ke diatu enda muat endur lebih 500 iku.

“Sarikei begunaka palan ke besai agi dikena nangkup peminta guna abis kurang 1,500 iku ba pengerami tauka program ke diatur perintah tauka peribit.

“Tu deka mantu ngurangka ungkus belanja enggau ngemandakka jam peranak Sarikei , ke sebedau tu ke Sibu (ngatur program) laban Dewan Suarah Sarikei ke diatu nyau enda muat endur orang ke datai ngagai pengerami besai,” ku iya seraya ngarapka perintah ulih berundingka peminta peranak Sarikei.