Zahid: RUU 335 nadai bekaul enggau ‘Hudud’
Tuju ubah undang-undang nya semina dikena ngangkatka penegap, pemanah servis Kort Syariah
KUCHING: Rang UndangUndang ( RUU) Ngatika Diri dikena ngubah Akta Kort Syariah (Bidang Kuasa Jenayah) 1965 ( RUU 335) nadai mungkur orang ukai bepengarap Islam sereta nadai bekaul enggau ‘Hudud’.
Sapit Menteri Besai Datuk Seri Zahid Hamidi madah, ubah undang- undang nya dikena ngangkatka penegap enggau pemanah servis Kort Syariah.
Undang- undang tu ukai Undang- Undang Hudud, tang nya ubah ngagai undang- undang ke endang udah bisi lalu sebedau tu kala diubah ba taun 1984, ku iya.
“Ditu aku deka nerangka enggau silik, Kort Syariah nadai ngambi sebarang bidang kuasa Kort Sivil, lalu RUU 355 tu nadai mungkur orang ke ukai bepengarap Islam.
“Tang tuju nya diubah (RUU 355) dikena ngemanah lalu ngenegapka agi Kort Syariah sereta minta ngagai perintah ngambika skim servis tu dikemanahka agi.
“Aku minta raban bansa ke ukai bepengarap Islam meretika ubah tu lalu orang ti bepengarap Islam ke bebida politik mega patut ulih meretika pekara tu dulu,” ku iya.
Zahid mansutka pekara nya ba aum pengarang berita, pengudah ke meri penemuai basa ngagai Kepala Menteri Datuk Patinggi Tan Sri Adenan Satem ba Begunan Kunsil Nengeri (DUN) ditu, kemari.
Dulu ari nya, ba aum pengarang berita nya, iya madahka diri bebasaka pemutus tauka penemu beberapa pemesai parti komponen Barisan Nasional (BN) bekaul enggau RUU 355 ke diperambu Kaban Parlimen Marang, iya nya Datuk Seri Abdul Hadi Awang.
Perintah Besai mega bebasaka penemu ti digaga Kepala Menteri Datuk Patinggi Tan Sri Adenan Satem, ti minta Kaban Parlimen BN ari nengeri tu sebedau tu, enda nyukung RUU nya.
“Aku udah nerang ngagai Kepala Menteri Sarawak ke alai undang-undang 355 tu endang udah bisi lalu kala diubah dalam taun 1984 sereta enda dipejuraika perintah ba aum parlimen ke sekali tu,” ku iya.
Nitih ku iya, RUU Ngatika Diri ti dibai kaban parlimen Marang nya ukai bacha ti kedua tang pejurai ke digaga iya ngambika nyadi Rang Undang-Undang Ngatika Diri dibantaika iya dalam bulan Mei tu tadi, lalu diubah laban nya ‘open ended’.
Sebarang ubah undangundang iya nya dalam bidang kuasa perintah, lalu nyema perintah bisi ati deka ngubah pan nya enda digaga dalam aum parlimen ke sekali tu, ku Zahid.
“Sebedau nya nyadi rang undang-undang dibantaika perintah, sekeda pekara deka dikemeratka lalu keterubah, Menteri Besai deka ngatur aum enggau presiden parti komponen BN.
“Kedua, nengah pemendar ari Menteri Besai kitai deka numbuhka komiti pemilih ti dipasuk semua parti politik enggau kaban parlimen Islam enggau ke ukai bepengarap Islam, dikena ngulihka timbal sereta meri penerang ubah ke amat ti digaga perintah,” ku iya.
Kelimpah ari nya Zahid ke mega Menteri Dalam Nengeri lebuh ditanya bekaul enggau penemuai iya ke Sarawak, sekalika nya bekaul enggau pekara tu, iya madahka nadai kaul enggau RUU.
“Penemuai aku ke Sarawak ketegal bisi tuju bukai, aku ke Astana nerima Midul Basa sereta betemu enggau Kepala Menteri ditu,” ku iya ke dulu ari nya beratika pengelanchar Aum Kunsil Nengeri ke benung diatur diatu.
Dalam bulan September taun tu tadi, Zahid ngenulu rintai nama115 iku penerima bintang enggau gelar basa beserimbai enggau Hari Pengawa Ke- 80 Tuai Megai Menua (TYT) Sarawak Tun Pehin Sri Abdul Taib Mahmud. Zahid diberi midul Datuk Patinggi Bintang Kenyalang ke mai gelar ‘Datuk Patinggi’.
Ditu aku deka nerangka enggau silik, Kort Syariah nadai ngambi sebarang bidang kuasa Kort Sivil, lalu RUU 355 tu nadai mungkur orang ke ukai bepengarap Islam.” Datuk Seri Zahid Hamidi Sapit Menteri Besai Malaysia