Jalai, ai beresi enggau ngemanah sekula entara tiga pekara dikemeratka Dr Rayong

KUCHING: Jalai penyambung, bekal ai beresi enggau atur ngemanah sekula ke udah buruk entara sekeda pekara ke dikemerat Kaban Kunsil Nengeri (ADUN) Engkilili Dr Jochnical Rayong.

Bejaku nyukung Rang Undang-Undang Bekal (2017) ba Aum Kunsil Nengeri (DUN) kemari, iya minta perintah ngemerat sereta ngelengkas pengawa nya.

“Perambu projek fasa 2 Jalai Ulu Skrang ari Ng. Murad nuju Rh Rantai, Lepong Kepayang meseti berengkah enggau lengkas.

“Aku minta autoriti ke bekaul bejalaika tanggungpengawa enggau lengkas ke alai geran ungkup projek tu udah disedia.

“Nadai kebuah projek tu lalu enda dipunka. Jematan, parit ba semanjai jalai majak tusur kelebih agi ba maya ujan,”ku iya.

Iya nambah, enti jalai nya udah dikemanah, peranak ke diau ngelingi ulih bejual utai tanam enggau utai tupi sida ke pasar.

Kelimpah ari nya, iya mega ngarap perambu ngangkatmanah jalai Batang Ai Ili ari Stuga/Basi nuju Brayun Sri Aman enggau perambu jalai ari Lidong meraka Sungai Batang Lupar patut digaga enggau lengkas.

Bayar pampas tanah enggau pun buah udah dibayar tang nyentuk ngagai diatu projek lalu bedau dipunka, tandu iya.

Ba sentang bekal ai beresi, Rayong ngerintai sekeda kandang endur baka ke ngelingi San Semanju,Bibung, Bunu, Beging, Titok, Berenggang, Gelong kelimpah ari Batang Ai Hilir, Engkilili enggau Skrang.

Semua projek bekal ai beresi ungkup semua kandang endur ku Rayong patut dikelengkas.

“Ngenang sentang sekula ke udah buruk ari baruh kuasa DUN Engkilili, aku minta sekula nya diangkatmanah nengah chara IBS,”ku iya.

Ba aum nya, Rayong mega minta perintah berunding ngangkat pelilih mit Engkilili nyadi seiti pelilih besai lalu Skrang nyadi pelilih mit.

Sekeda pekara bukai ke dikearap Rayong dikemansang iya nya, kandang endur AgroPolitian Bukit Sadok, nyendiaka arus internet ke deras agi, numbuhka seiti klinik di Skrang sereta nyendia lampu jalai ba sekeda kandang endur.