Mosyen dibantai ADUN Padungan enda diterima Speaker DUN
KUCHING: Mosyen ti dibantai ADUN Padungan Wong King Wei bekaul Mulaika Status Sarawak nengah Perintah Tetap 15 di tulak Speaker Kunsil Nengeri (DUN) Datuk Amar Asfia Awang Nassar, kemari, ba aum Kunsil Nengeri.
Asfia madah pekara nya ukai pengawa ke deka digaga enggau lengkas laban komiti teknikal pasal mulaika kuasa deka bejuraika perambu nya ari Sabah dulu lalu ngubah Konstitusyen Perintah Besa baka ke udah dipadah Sapit Kepala Menteri ti mega ADUN Baleh, Tan Sri Datuk Amar James Masing.
“Enti deka ngasuh mosyen nya mujur nengah Perintah Tetap 15, pekara nya enda tau enda tetap, dikereja jampat laban beratka rayat.
“Amat mosyen tu tetap sereta beratka rayat baka ke udah disebut Sapit Kepala Menteri, tang iya ukai pekara patut dikereja lengkas,” ku Asfia madah lebuh mantaika pemutus mosyen ke udah dibantaika Wong ba aum Kunsil Nengeri ditu, kemari.
Ku iya, mosyen nya enda tau enda ngemenuhka tiga pekara, iya nya tetap, lengkas) sereta pemerat rayat.
Kemari, Wong ke udah nganjung mosyen nya ngenyit ngagai Sekretari Kunsil Nengeri, nyengkaum nganjung siti salin mosyen ke diperambu nengah Perintah Tetap 15 notis DUN Sarawak.
Sebedau tu, Wong madahka mosyen nya dibantaika Sapit Kepala Tan Sri Datuk Amar James Masing kena Hari Dua tu tadi ti madahka nadai timpuh ditetap minta autonomi, lalu nadai timpuh ke udah ditetapka ke Perintah Menua ngansak penuduk Sarawak nya dipulaika.
Ku iya, Sapit Kepala Menteri nya bisi madah proses ngemujur pekara nya panjai sereta enda mudah.
Usul dalam pekara (Restoration of Status of Sarawak) ke dirintaika Wong nyengkaum Federal Constitution ke di ubah dalam 1976, nurunka penuduk Sarawak ari 3 bengkah sitak menua ke enggau ngempung Malaysia, ngagai sebengkah menua ari 13 buah sitak menua.
Lalu, kena 2 November 2016, Kepala Menteri bisi madahka Perintah Menua deka mantaika Usul dalam Aum Kunsil Nengeri ngagai ‘ inter- alia’, minta Perintah Besai mulaika penuduk Sarawak baka ke udah, iya nya sebedau 1976.
“Kami udah nyendiaka semua pekara. Siti salin mosyen ke disadang tu bisi dibai kami lalu dikelai enggau ‘Annexure A’’,” ku Wong.