525 lot endur diau bisi disediaka di Kpg Kupang
KUCHING: Skim Ngemesaika Genturung Pendiau Kupang, Saratok udah nyendiaka urung 525 lot endur diau.
Menteri Muda Pemansang Pengawa Dagang Datuk Naroden Majais lebuh nyaut ADUN Kalaka Datuk Abdul Wahab Aziz madahka taja pia, pengawa magi lot di skim nya bedau ulih digaga laban beratika ungkup kena nyendiaka pemungkal infrastruktur enda dikemendarka dalam Langgur Malaysia ke11 (RMK ke-11).
Dalam tanya Abdul Wahab ngagai Opis Menteri Pengawa Industri, Pemansang Pengawa Dagang, enggau Pengawa Nanam Puku bekait enggau sitak tanah kena lot Genturung Pendiau di Kampung Melango Lama/Pagan Saratok, bisi dipadahka urung 500 lot udah disediaka kena ngaga rumah di sitak nya.
Taja pia, bisi disadan- gka, pengawa tu deka dikemansangka berenggat lalu deka dibantaika baru ngambika ulih diperundingka maya Pansik Tengan Penggal RMK11.
Lalu pia mega, di sitak Batu Kitang, urung 500 unit rumah ke ulih dibeli ari baruh Program Pengawa Berumah Rayat (PPR) udah dikemendarka ulih digaga di Kampung Landeh.
“Pengawa ngaga unit tu deka dipunka pengudah pemendar ari sekeda ejensi dalam pekara bekait enggau Pelin Sub- Division, Pelin Injiniring, enggau Pelin Lukis Arkitek udah diberi. Projek tu dijangka deka dipunka pun taun nyin ila,” ku Menteri Muda Pengawa Berumah Datuk Abdul Karim Rahman Hamzah madah lebuh nyaut ADUN Batu Kitang, Lo Khere Chiang dalam sesi Tanya enggau Saut (Q&A) di Aum Kunsil Nengeri ke18 di Komplek DUN ditu, kemari.
Iya nandu baru madahka, semua rumah murah baru ari program PPR, ungkus iya nya nyengkaum ungkus tanah, diberi Perintah Besai.
Di sitak Bukit Semuja, seiti skim ke dikelala enggau nama Skim Berumah Baru Serian II ke bepalan di sitak Ranchan udah dikemendarka kena bulan Mac 2016 tu tadi. Ari baruh skim tu, palan endur berumah baru tu iya nya mungkur pemesai 69 ikar.
Skim tu dibuka nitihka perambu kena nampung pemerat lot endur diau ungkup mensia mayuh ba kandang menua ngelingi Serian.
Perambu ngaga skim tu deka dianjung dalam Pansik Tengan Penggal Langgur Malaysia ke-11 (RMK ke-11), ku Naroden lebuh nyaut ADUN Bukit Semuja John anak Ilus dalam sesi Tanya enggau Saut (Q&A) di Kompleks DUN ditu, kemari.