Lisin palan pemerindang deka digantung nyema disalah guna

KUCHING: Pengempu palan pemerindang ke udah salah nguna lisin ke diberi nengah pengawa bejalaika main judi siber ketegal deka ngulihka untung ti mayuh, deka digantung.

Nitihka pansik Polis Diraja Malaysia ( PDRM), urung 4,349 pengawa ngabas ngenyit udah dipejalaika ba timpuh ari 1 November 2015 ngagai 31 Oktober 2016 berindik ari Ops Dadu ke dipun kena bulan November 2015 bekaul pengawa salah bemain judi nyengkaum judi siber.

Berindik ari operasi tu, mayuh pengawa ngabas ngenyit sereta orang ke udah ditangkap piak PDRM.

“Atur ke digaga PDRM ngemunaska pengawa salah tu mayuh diripot dalam surat berita di menua tu. Nitihka pansik PDRM, urung 4,349 pengawa ngabas ngenyit udah digaga ke timpuh ari 1 November 2015 ngagai 31 Oktober 2016.

“Dalam kandang timpuh nya mega, wang asil tangkap iya nya dalam penyampau RM88 ribu sereta 826 mesin judi dirampas, lalu urung 496 orang ditangkap ketegal penyalah bemain judi,” ku Menteri Muda Opis Kandang Menua Datu Dr Penguang Manggil madah lebuh nyaut tanya ari ADUN Yussibnosh Balo maya sesi Tanya enggau Saut (Q&A) di Aum Kunsil Nengeri Hari ke-4 di Kompleks Kunsil Nengeri ditu, kemari.

Iya nandu baru, Perintah deka ngambi atur ke terit lalu enda meri peluan ngagai orang ke bejalaika palan pemerindang ke enda ningaka lalau sereta enda nitihka tanggung pengawa.

“PBT udah diasuh berati sereta ngambi atur ke patut lalu enti ditemu orang ke bempu palan pemerindang nya salah guna lisin bejalaika pengawa dagang, lisin sida deka dikinsil,” ku iya.

Ku iya, operasi begempung sereta pengawa ngabas ngenyit ba palan judi deka dipajakka PDRM ke bekerejasama enggau PBT, Sarawak Energy Berhad ( SEB), Telekom, sereta ejensi bukai.