Memorandum hak peranak asal disua ngagai perintah
Ketegal nya sida betapi mayuh bengkah pemar ba pengidup
Isu tu ngujungka hak sida ke nyadi orang asal enggau rayat Malaysia enda dikeibuh. Mujan Jok Pengari Orang Asal Sarawak
KUCHING: Orang Asal Sarawak ngenatai seiti memorandum dikena minta hak peranak asal ari Perintah Nengeri.
Memorandum nya disua pengari Orang Asal Sarawak, Mujan Jok ngagai Menteri Pengintu Pengelantang, Orang Indu enggau Komuniti , Datuk Fatimah Abdullah.
Bejaku ba aum pengarang berita di Bilik Media, Begunan Dewan Kunsil Nengeri (DUN) ditu kemari, Mujan madah memorandum nya ngarika pinta ari semua Orang Asal Sarawak ngambi isu hak peranak nengeri enggau proses meri surak beranak sereta tingki diperunding enggau berat sereta lengkas.
Ku Mujan, ngelama tu orang asal Sarawak kelebih agi ke diau di menua pesisir napi pemar ngulihka surat beranak enggau tingki.
Pemar tu ngujungka sida nadai status peranak nengeri taja pan nyadi orang asal di Sarawak enggau Malaysia.
“Isu tu ngujungka hak sida ke nyadi orang asal enggau rayat Malaysia enda dikeibuh.
“Sida enda ulih mindah ke menua luar taja pan ke Semenanjung Malaysia.
“Mayar ungkus berubat ke mar ketegal megai status peranak luar. Enda ngembuan hak besekula lalu enda ngasaika semua hak ke disedia ungkup peranak Malaysia enggau Orang Asal Sarawak,” ku iya.
Country Reports on Human Rights Practices-Malaysia ke dikeluar United States Department of States kena 8 April 2011 ku Mujan ngeripot dia perintah udah besemaya ngelangkar atur meri surat beranak enggau tingki ngagai bansa Penan.
Taja pia, semaya tu enda lama lalu nyentuk ke diatu, beribu iku bansa Penan enggau Orang Asal nadai surat penerang diri.
Mujan ke nyadi aktivis isu tingki Sarawak nambah, anggar kasar orang asal ke nadai ngembuan tingki di Sarawak manggai 30,000 iku.
Berindik enggau nya, Mujan minta Orang Asal Sarawak diberi surat beranak enggau tingki.
Orang Asal Sarawak mega minta proses meri surat beranak enggau tingki diserahka ngagai Perintah Nengeri.
Proses ngenataika pinta ba kededua penerang nya ungkup sida ke diau di menua pesisir patut nadai mayuh kelikuh lalu dikemujur enggau mudah.
Enti bisi ke lenyau penerang enggau laun ngenataika pom pinta, pemar nya patut diperunding enggau manah ketegal pengidup orang asal bebida enggau pengidup di mengeri.