Seraban 39 iku nembiak SK Tegulang mujur nembuka program pelajar khas
KUCHING: Seraban 39 iku nembiak Sekula Primari (SK) Tegulang ari bansa Penan di Murum ti baru nembuka program pelajar lapan bulan ke digaga khas dikena mantu sida meretika pengelandik macha, nyepil enggau nulis dalam Jaku Melayu enggau Jaku English.
Nitihka penerang berita apin lama udah, nya dipejalai dikena ngemanahka agi tikas pelajar dalam peresa perintah keterubah sida ba tikas UPSR.
Program nya udah mujur dipejalaika Sarawak Energy Berhad (SEB) ti khas digaga ungkup nembiak bansa Penan ke tinggal dalam pelajar ba SK Tegulang.
Sekula tu sebuah ari dua buah sekula primari ti ditumbuh dalam Skim Pengentap Pendiau Baru Murum.
Program udah dipejalaika Gerempung Disleksia Sarawak (DASwk) lalu diatur nengah kerejasama Opis Pelajar Sarawak enggau Konsulat Amerika Syarikat di Kuala Lumpur.
Nya udah dipejalai ungkup nembiak Primari 2 nengah chara inovatif ti ngerinduka ati sereta chara ngajar ngaul sida dikena meransang nembiak regas belajar lalu ngangkatka pengelandik macha enggau nulis.
Program tu ngena chara bepelasarka fonik ke diuji, chukup berurun, intensif, seruran ditandu, kumulatif enggau multi- sensorial ti udah nyata ngemudahka pengawa belajar.
Bala nembiak ti nembuka program tu udah nerima setipikit penyereta rambau nutup program ke diatur ba Long Wat bedau lama ke udah.
Setipikit udah disua Ketuai Tanggungpengawa Rama Korporat ( CSR) SEB, Jiwari Abdullah, disempulang Menijar Kanan Pemeranak Puku Rama enggau Komuniti, Joanne Tan Cho Yian enggau Presiden DASwk, Dr Ong Puay Hoon.
Kepala Pengajar SK Tegulang, Anu Garing enggau Chairman Komiti Pemansang Penan Murum (MPDC) Labang Paneh mega bisi datai rambau nya.
Nitih ku Dr Ong, program tu berat agi ngagai pekara ngasuh raban bansa Penan sebaka enggau raban bansa bukai ba tikas pelajar.
Pia mega ku iya, bala nembiak ba kandang menua nya betapi enggau penanggul ke baruh agi ba tikas nemu urup kelimpah enda datai ke sekula, tinggal pelajar enggau prestasi ke lemi dalam peresa.
“Pelajar tu hak asasi mensia lalu nyema bala nembiak tu nemu macha, iya ulih chakah agi nyereta aktiviti belajar di sekula.
“Pia mega, sida deka bisi pengandal agi ngaul diri,” ku Dr Ong.
SEB nyukung pengawa CSR ti majak dipejalai ungkup projek komuniti di Loji Hidro Elekterik Murum ke kena pangka, kelebih agi raban bansa Penan ke idup nadai pengentap ngujungka bala anak sida suah puntan ngenataika diri ke sekula sereta nembuka pelajar sekula.
“Kami nemu sereta ang- kunka pemesai guna pelajar ba pengawa ngemansangka pemansang rama enggau ekonomi.
Nengah chara bekunsi ti tegap kelebih agi ngagai organisasyen baka DASwk tu, kitai ngarapka kerejasama negah chara aktif tu mantu perintah nyukung bala nembiak di menua pesisir ti patut dikemerat ngambika sida mega ulih ngaul diri dalam arus pemansang nengeri,” ku Jiwari.
Sama bisi datai komuniti Penan ari Long Wat enggau Long Malim.
Sida mega numbuhka Perpustakaan Komuniti Mini ke ditumbuh dikena meransang sereta nerenak pengerindu macha ba raban nembiak.
Sehari tu, nengah Program Literasi Murum, lebih ari 300 iku komuniti Penan besai tuai ulih macha, nulis enggau ngaga aritmetik muntang.
Projek literasi udah dipejalai nenagh kerejasama Serakup Pemansang Indu enggau Ruang Bilik Sarawak (SWAF) ti diaku ba renggat nasional enggau antarabansa ba pemujur ke udah dijapai.
Dikena mantu pemansang pelajar nembiak Penan, SEB dalam taun nyin tadi udah ngemendarka wang turu pelajar RM200,000 kelebih agi ungkup komuniti Penan di Belaga ti lalu meri pemaik ngagai bala komuniti ba Skim Pengentap Pendiau Baru Murum.