Penerima bantu e-kasih ke enda mujur patut terus diembing
KAPIT: Peranak menua pesisir kelebih agi ke bisi bulih bantu e-kasih patut terus diperansang tauka diembing ukai ngelengka ke sida pia aja sepengudah bulih asil keterubah.
Jaku tu udah dipansutka Kaban Parlimen Hulu Rajang, Datuk Wilson Ugak Kumbong maya bejadika Kus Teknologi Nanam Baru Getah ba Rumah Bully, Kerangan Besai, Baleh apin lama ke udah.
“Sida ke kala bulih bantu ekasih tu patut terus diembing lalu ukai dilengka pia aja meda sida udah ulih ngati kediri.
“Baka seharitu bisi 31 sida dikangau nyereta kus tu lalu sida patut terus disukung. Sida ke bisi bulih skim nupi jelu, itit enggau manuk patut mega disukung.
Enti sema projek ke digaga sida enda mujur jemah anang ninggalka sida,”ku iya.
Ba pengawa nya, iya madahka raban ari Opis Betanam Betupi patut ngaga pansik ba genap rumah panjai ke tau bulih bantu sum padi sereta rachun dikena bumai bukit tauka paya.
Iya madah agi mayuh sida ke diau ba rumah panjai ngereja pengawa bumai tauka betanam ari sida ke diau ba pasar tauka mengeri lalu sida ke diau ba rumah panjai mega endang patut diberi magang.
Ugak madahka perintah patut muka peluang ngagai orang ke gawa nyaga stesyen Opis Betanam Betupi baka ba Nanga Gaat, Melinau, Oyan enggau Merirai ke nyadi sub stesyen opis tu kelebih agi lebuh beambika sum padi tauka rachun awakka enda ngenusah peranak rumah panjai mai sum tu pulai ke menua lalu ngelimat belanja sida ti ngambi sum.
Kelimpah ari nya, Ugak mega ngenang pasal sekeda pengajar ke selalu tumu pulai lebuh ujung minggu kelebih agi ba ulu sungai.
“Bala pengajar ke ngajar ba ulu sungai patut ngajar nembiak nitihka jam ke chukup ba sekula ukai naka Hari Empat aja, kekadang berengkah ngajar Hari Dua. Mayuh sida tu Hari Empat enggau Hari Lima udah dikedayau ba basar. Sida tu enda rugi tang nembiak ke rugi laban belajar enda chukup jam ba sekula.
“Bala apai indai nembiak ke diajar sekeda pengajar tu tadi andal ngarapka pengajar ngajar anak sida iya besekula, nya kebuah diatu mayuh apai indai nganjung bala anak sida iya besekula ke pasar ,”
“Pia mega, opis menteri ke bekaul patut mansik bekal ai beresi ba sekula rumah panjai ukai begunaka ai tapis ari sungai.
“Bala nembiak sekula rumah panjai patut diberi bekal ai ke beresi nangika mudah dirampit penyakit ke enda disadang,” ku iya.
Berebak enggau nya, Ugak bisi ngungkupka belanja RM10,000 ngagai JKKK Rumah Bully sereta RM5,000 ngagai biro indu sida.
Ba pengawa bukai, Ugak bisi nyuaka chek ngagai biro indu Rumah Empang, biro indu Rumah Gendang, biro indu Rumah Aji, SIDS Pampang Pila, JKKK Punan Ba, JKKK Sekapan Panji, JKKK Uma Bawang enggau Kelab RANDO Belaga lebuh ke bejadika pengawa Mangkong Tiang ba Rumah Empang,Nanga Bilat,Sungai Pila apin lama ke udah.
Sama bisi datai ,Sapit Direktor Opis Tenaga Kereja Kapit, Khusairy Pangkas, Supervisor JASA P216 Hulu Rajang, Jennifer Jantai Masing, staf Opis Nembiak enggau Lumba, Magdline Eddie Saga, bala tuai rumah enggau ke bukai.