Watson dipadu nyadi Duta SG Akademi Sarawak
KUCHING: Ex-jaguh pechut menua, Watson Nyambek ke dipadu nyadi ‘Duta SG Akademi Sarawak’ dikearapka ulih nyadi peransang ngagai anak Sarawak lebih agi bala nembiak ba SG Akademi Sarawak.
Orang ke mungkal SG Akademi Dato Sri Ganesh madah, akademi milih Watson, ti mega tebilang enggau nama ‘The Flying Dayak’ nya, ngambika nyadi peransang nembiak nitihka singkang pemujur iya nyapai tikas antarabansa.
“Kami milih Watson laban iya nyadi ‘ikon’ tauka chunto ngaga nembiak kelebih agi bala nembiak sekula di Sarawak tu.
“Iya nyadi pilih ke pengabis manah sereta ‘ikon’ ngagai nembiak sekula, ngambika sida ulih nitihka singkang pemujur iya dalam mayuh macham bidang lumba enggau main, nya kebuah Watson diberi gelar ‘Duta’ ke pengabis manah,” ku iya.
Iya madah munyi nya ba sebengkah pengawa nyiri Wilson, ke digulu Sapit Menteri Pemansang Menua Pesisir sereta Kandang Menua, Datuk Alexander Nanta Linggi enggau Chairman Yayasan Pengelantang Pendiau Atlet Nasional (YAKEB) Datuk Noorul Ariffin Abd Majeed ditu, kilah malam ensanus.
Iya nandu, Watson nyadi Duta keterubah ungkup akademi sida ba Sarawak lalu merambu deka mai ‘ikon’ anak Sarawak bukai nyadi ‘duta’ ngambika ulih nyadi sebagi ari raban sida jemah.
“Kami deka terus ngangkatka penau raban nembiak lalu ngemansangka pengelandik nya nyentuk ngagai tikas entarabansa.
“Ba Sarawak tu, akademi betatika tiga kus ke nyadi pemerat, iya nya hospitaliti, kulinari enggau mekatronik,” ku iya.
Iya madah SG Akademi ti dibuka dalam taun 1999 di Semenanjung Malaysia nya, ngerembaika sayap sida ngagai Sarawak dalam taun 2012 ba Miri lalu dalam bulan Ogos 2016 di Kuching, ti mega nyadi pampang opis Ke-6.
Ba pengawa nya mega, Nanta ngarapka pengawa nya deka ngenataika pemaik ke ‘menangmenang’ ngagai akademi enggau Watson empu.
Nanta ti mega nyadi Kaban Parlimen Kapit nya nandu, tu seiti ari pekara ke besai reti ngagai Watson, pengudah betapi enggau penanguk sebedau tu, lalu mantu meri iya pendiau ke baru pengudah pinchin ari pengawa lumba.
“Taja pia, Watson agi nyadi pemerat ngagai komuniti Sarawak pengudah nempa sejarah dalam pengawa lumba lalu enggau nya, aku ngarapka kerejasama tu deka mai penguntung,” ku iya.
Watson maya dirandau pemberita, meri terima kasih ngagai SG Akademi enggau YAKEB laban meri pengandal lalu nyiri iya nyadi ‘duta’ akademi nya.
“Aku ngarapka kaul SG Akademi enggau aku meruan manah dikena nyapai pemujur program ke dipejalaika sida udah tu,” ku iya.