Konsert Krismas Katolik nyata ngayanka ‘pengasih’ Tuhan
MIRI: Pesan ‘pengasih’ Krismas endang berupai amat dipandangka raban pemerindang ngagai temuai ke ngulu Konsert Krismas Katolik bepalan ba Balai Suarah Miri kena malam Hari Lima tu tadi.
Bishop Richard Ng ari Roman Katolik Diocese Miri begulai enggau beribu iku raban bukai ke datai ngulu pengawa beperindang pengelama tiga jam nyengkaum karoling, jaku puji enggau sembah, koir, drama sereta tanda.
Bisi mega bekunsika Injil dikenatai Father Martin Sta dalam Jaku Mandarin enggau ‘spontan’ dikunsika Fr. Gabriel Cheong
Urung 300 iku pemerindang ari mayuh bengkah unit Diocese mantu ngerichahka konsert nya sereta nyapai rambai jaku ‘Sayauka pangan diri’.
Sekeda ari raban ke merindang iya nya ari Raban Koir Katedral St Joseph ( Jaku Melayu, English, China), Koir Carmelite, Raban Nembiak (MYCS, FIAT, St Dominic enggau Gerija Rosari) Sekula Hari Minggu (China enggau Melayu) sereta Legion of Mary.
Bishop Richard dalam jaku dipansutka iya madah konsert tu deka bekunsika pengasih Tuhan nengah lagu, drama enggau Jaku Tuhan, seraya nambah alai Krismas tu dikena ngerami pemesai penyayau Tuhan ngagai genap iku mensia.
“Iya (Tuhan) sayauka ke kitai chukup enggau nganjung anak lelaki iya, Jesus, ada ke dunya nyadi mensia ngambika iya ulih nuchi dosa kitai. Ketegal Tuhan chukup sayauka kitai, kitai mega meseti malas penyayau iya enggau sayau ke iya enggau pangan diri.
“Tu kebuah Krismas diintu. Kitai semua bela ngasaika pengelantang enggau penyayau sereta deka bekunsika pengasai nya enggau pangan diri,” ku iya nyemetak.
Ku Bishop Richard nampung alai konsert ketiga kali ninting taun bejudul ‘ An Evening of Carols’ mega diatur kelebih agi diungkup ngagai sida ke apin ngelala sapa Jesus.
“Dikearap nengah pengawa nyadaka karol Krismas ti manah enggau bekunsika jaku Tuhan, sida nyangka deka muka ati deka ngelala silik agi pasal Jesus lalu nitihka iya,” ku iya.
Kelimpah ari pengawa pemerindang, bisi mega bansal gambar enggau ‘seri dana’ sereta mega pengawa ngiga belanja ungkup belanja projek Wisma St Joseph.
Konsert ninting taun diatur begulai bala nembiak sekula Xing Zhi Guang enggau Ra- ban Nembiak Sekula China Katedral St Joseph Miri sereta FIAT Working Youth.