Gerija St Ann ba Jalai Landeh deka dibuka kena April 2017

KUCHING: Urung 22,000 Kristian Katolik ke diau di sitak Batu 10, Jalai Puncak Borneo, Annah Rais enggau Padawan ulih besembiang ba Gerija St Ann, di Jalai Landeh, Batu 10, enti iya udah dibuka ba bulan April 2017 ila.

Ungkus ngaga gerija RM400,000, asil ari bantu Perintah Nengeri engau Perintah Besai, kelimpah bantu ari Menteri Opis Kandang Menua ti mega Presiden Parti Sa’ati Rayat Sarawak (SUPP), Prof Datuk Dr. Sim Hui Kian.

Rektor Parish St Ann, Father Gerard Victor, madah pemisi gerija baru St Ann ke digaga engau teknologi moden sereta alai besai nya meri pengelantang ngagai mensia mayuh besembiang ditu.

“Kami beterima kasih ngagai Perintah Nengeri laban peminta raban Kristian Katolik ditu udah diturut.

“Mensia majak nambah, lalu kami pan ngasaika kami sigi patut nyendiaka palan besembiang ke lantang sereta besai,” ku Father Gerard madah lebuh dirandau maya nguluka ADUN Batu Kitang ti mega nyadi Chairman Opis Kaunsil Mengeri Padawan, Lo Khere Chiang ngabas projek nya, apin lama ke udah.

Sebedau tu, ku iya, Gerija lama St Ann semak Pasar Batu 10, enda chukup ketegal pemayuh orang nurun besembiang, perengka guna mega mayuh enda chukup.

“Enti suba, laban kelalu mayuh orang besembiang, kami nadai chara bukai tang ngangkut kerusi ari luar dikena duduk ba gerija. Pemisi gerija baru St Ann tu seiti berekat ari Tuhan,” ku iya ke beterima kasih ngagai Lo ke udah mantaika sebana sida ngagai Perintah Nengeri.

Pengawa ngaga gerija baru St Ann nya diatu baru berengkah lalu deka digaga empat renggat.

“Kami agi begunaka bantu ari perintah,” ku iya seraya madah atur sembiang ba gerija St Ann deka ngena tiga jaku, iya nya English, Melayu enggau Mandarin.