Pelilih Kapit betuah laban dua kali dipilih endur ngatur MOP

KAPIT: Pemesai Pelilih Kapit, Elvis Didit madahka Pelilih Kapit chukup betuah laban ari 40 pelilih menua di nengeri tu, semina pelilih menua tu ngembuan dua Program Mobile Outreach (MOP) dalam taun 2016 tu.

Program keterubah udah diatur ba sitak Kunsil Nengeri (DUN) N63 Bukit Goram ba Rumah Tat, Batang Rajang lalu seiti agi ba Rumah Yan, Nanga Merit pegai sitak DUN Belaga.

“Kitai enda bechiping alai udah merambu dua iti program agi dalam taun baru lalu seiti deka diatur ba DUN N61 Pelagus sereta rumah panjai endur ngatur mega udah dikelala.

“Aku bedau berandau enggau Kaban Kunsil Nengeri ( ADUN) ba menua nya ( Wilson Nyabong Ijang) sereta piak bekuasa bekaul senentang tarikh ke patut.

“Seiti da agi deka diatur ba Pasar Kapit laban kitai meretika pasar tu palan ke dituju semua mensia mayuh datai ari kandang menua pesisir alai Kapit tu ukai MOP tang dikelala ngena nama Palan Transformasyen Komuniti (CTC).

“Program tu deka ngempuruka semua piak ejensi bekaul nesau penatai peranak ke diau di Pasar Kapit nadai ngira ari ni asal penatai sida,” ku Elvis rambau bejaku ngagai pengarang berita ba Rumah Yan Ngumbang, Nanga Mujan, Pelilih Mit Merit kena Hari Enam tu tadi.

MOP tu beguna endar laban kitai bebendar nguji ngemai penerang enggau servis ngagai genap ruang bilik di menua pesisir. Kitai nguji nyadi jematan ngenyemak takah antara perintah enggau rayat.

Kitai enggai semina dipeda lantang ngereja pengawa dalam opis aja. Kitai deka ma- dah ngagai rayat alai kita ulih ngelawa menua sida enggau nadai penanggul, ku Elvis.

Ku iya nerang, tim iya ngelawa Rumah Yan ukai semina datai ari bala staf Pelilih Kapit aja tang mega ari opis ke bukai – ari perintah besai enggau mega perintah nengeri. Program tu berengkah kena ngalih hari Hari Lima sereta muak ke malam lalu ditampung Hari Enam.

“Kami ngadang mayuh bala deka datai laban tu ngaul ti komponen ke chukup beguna ti ulih matak penatai mensia mayuh. Opis Perubat ngatur pengawa beperesa pengerai. Kami chukup benasit disaup Tim Perubat ari raban soldadu, Opis Perubat enggau mega Klinik Ngeli.

“Servis ari Opis Pengerejista Bansa (JPN) mega bisi nyempulang kami. Lalu program ke bukai iya nya Bantu Rayat 1Malaysia (BR1M). Nya alai aku ngemai mayuh staf mutarka pekara bekaul enggau peminta BR1M ba pengawa ngemaru enggau nganjung peminta enggau jampat,” ku iya nerang.

Peranak menua pesisir di Nanga Merit, Sungai Pila, Metah, Nanga Sama enggau Punan Bah ngena awak servis tu seraya betemu enggau pengari rayat sida.

Program tu udah dipenyadi Sapit Menteri Pemansang Menua Pesisir enggau Kandang Menua, Datuk Alexander Nanta Linggi ke lalu nyadi penyandang maya pengawa bepilih ti deka datai.

“Aku ulih nyamin perintah deka neruska program ke bansa tu dalam taun baru, kelebih agi di kandang menua pesisir baka Kapit alai akses perengka guna perintah agi betapi enggau pemar enti manding enggau pelilih menua bukai. Program tu endang patut mungkur kandang menua ke besai agi,” ku Elvis nampung.

Iya meri besai terima kasih ngagai ejensi perintah ke bisi ngaul diri dalam MOP ke diatur ba Rumah Yan, Nang Merit.

MOP tu dipejalaika Unit Pemantau enggau Bejalaika Pengawa Nengeri (SIMU) dikoordinat Opis Pelilih Kapit sereta disereta urung 33 bengkah ejensi perintah.

“Program tu nerima kerejasama ke manah ari semua ejensi perintah kelebih agi raban soldadu ti ngatur Klinik Ngeli enggau kaunter perubat ungkup pengawa beperesa pengerai enggau beperesa ngeli.

“Kami mega muka kuanter Opis Betanam Betupi, Opis Pengerai, Opis Pengintu Pengelantan, JPN, Opis Pemansang Mensia Mayuh (KEMAS), Opis Pekara Khas (JASA) enggau opis ke bukai,” ku Douglas lebuhka dirandau pengarang berita ngelansa pasal pemujur atur program nya.

Pia mega ku iya, program tu ngemai penguntung ngagai mensia mayuh kelebih agi sida ke diau di kandang menua pesisir nengah strategi MOP tu ari baruh Strategi Tasik Gadung Nasional (NBOS) Sarawak alai perintah ulih ngenataika servis ngagai genap pintu ruang bilik. Nya alai sida enda kiruh ngelawa pasar nerima servis baka nyaga pengerai, ngisi pom bantu laban semua tu bisi dibai ngagai sida.

Kaban Parlimen (MP) Ulu Rajang Datuk Wilson Ugak Kumbong, Sapit Residen Kapit Galong Luang, Pemesai Pelilih Kapit Elvis Didit, Pemesai Special Branch (SB) ASP Chua Su Hua, Penulung Direktor Opis Orang Gawa Kapit Khuisary Pangkas, Penghulu Esit Nalo, bala ketuai opis, ketuai komuniti sekeda bala ke bisi datai ngulu program nya.