Servis arus penyambung ba Kapit patut dikemanah
KAPIT: Pemayuh mensia ke nguna telefon binching enggau servis arus penyambung tauka internet majak nambah tang servis perengkaguna tu ditu balat lubah sereta patut dikemanah enggau lengkas.
“Telefon binching enggau servis internet nyadi seiti pekara beguna bendar diatu. Tiap kali bisi penusah, kitai seruran ngiga lumur orang ke ulih mantu, tang nyelai ba Kapit, servis baka tu tusah dikena. Bisi maya servis nadai ayan sereta maya bisi dipeda servis nya lubah dikena,”ku Chairman SADIA pampang Kapit, Edward Mangah.
“Dikena mutarka penanggul tu, tiang telekomunikasyen udah digaga ba palan ke jauh ari pasar Kapit baka ba Sungai Amang, Bukit Goram, Sungai Pelajau,Ulu Sungai Kapit, Jalai Ulu Sungai Yong, Mujong, Baleh tang mensia mayuh sebana tiang telekomunikasyen nya semina digaga aja tang enda ulih meri servis ke menyana,”ku iya.
Seiku komiti publisiti Bukit Goram PBB Watson Awan, madahka penanggul nya bela suah ditapi sida ba ba KM3, Bukit Goram Height.
“Enti nitih gaya diatu, penanggul servis telekomunikasyen tu siga nadai dikeibuhka sida ti megai pangku pengawa.
“Penanggul baka tu balat ngenusah mensia mayuh laban perengkaguna tu sigi diguna amat,” ku iya.